Mungesa e avokates e pamundëson mbajtjen e shqyrtimit fillestar ndaj dy të akuzuarve për krime lufte

Ka dështuar të mbahet seanca e shqyrtimit fillestar të mërkurën, më 05.02.2025, ndaj dy të akuzuarve, Ivica Rajkoviq dhe Dragan Deniq për “krime lufte” në Kosovë.

Seanca dështoi të mbahet pasi ka munguar avokatja e të akuzuarit Dragan Deniq, Milka Milosavljeviq.

Gjyqtari Rrahman Beqiri bëri të ditur se Gjykata i ka dërguar ftesë të rregullt, por dje, më 04.02.2025, përmes telefonit, përmes përkthyesit të Gjykatës, kishte komunikuar me avokaten Milka Milosavljeviq dhe e njëjta i kishte thënë se ka një rast me paraburgim në Degën në Graçanicë, mirëpo do të paraqitej me një vonesë prej 30 minutave.

Ndërsa para se të fillonte seanca, përsëri Gjykata përmes përkthyesit u tha se kishte kontaktuar me avokaten. E njëjta vetëm e kishte hapur telefonin dhe sapo përkthyesi kishte filluar të flasë e kishte mbyllur.

Po ashtu, gjyqtari Beqiri bëri të ditur se ky gjykim do të zhvillohet në mungesë për arsye se vendbanimi i të akuzuarve tani për tani është i panjohur.

Pasi që nuk kishte kushte ligjore për mbajtjen e shqyrtimit fillestar, e njëjta u caktua më 13.02.2025, nga ora 09:00.

Ky rast po trajtohet në Departamentin Special në Gjykatën e Prishtinës me kryetar të Trupit Gjykues, Rrahman Beqirin.

Ndërsa Aktakuza po përfaqësohet nga prokurorja, Florije Salihu-Shamolli.

Dosja e Prokurorisë

Prokuroria Speciale, më 27.11.2023, ka ngritur Aktakuzë ndaj të pandehurve: Ivica Rajkoviq dhe Dragan Deniq.

Në Aktakuzë përshkruhet se si pjesëtarë të forcave policore të Ministrisë së Punëve të Brendshme të Serbisë, gjatë luftës në Kosovë, pas fillimit të bombardimeve të NATO-s më 24 mars 1999, në kundërshtim me rregullat e të drejtës ndërkombëtare humanitare, të përcaktuara në Konventat e Gjenevës të 12.08.1949, gjatë një sulmi të gjerë dhe sistematik nga forcat ushtarake, policore dhe paramilitare serbe kundër popullatës civile shqiptare në territorin e Komunës së Prishtinës, duke ditur për ekzistimin e një sulmi të tillë, në bashkëkryerje me pjesëtarë të tjerë të këtij Njësiti, morën pjesë në dëbimin e popullatës civile shqiptare, plaçkitjen e tyre, kryerjen e dhunës fizike dhe psikike ndaj tyre, si dhe me përdorimin e dhunës dhe veprimeve të tjera çnjerëzore kanë kryer dhunim seksual ndaj gruas së nacionalitetit shqiptar.

Me çka, siç thuhet në Aktakuzë, të pandehurit në bashkëkryerje me persona të tjerë të uniformuar dhe të armatosur kanë kryer vepër penale: “krimet e luftës kundër popullsisë civile”, nga Neni 142, lidhur me Nenin 22 të Ligjit Penal të Republikës Socialiste Federative të Jugosllavisë, aktualisht e inkriminuar si “krimet kundër njerëzimit”, nga Neni 143 Par.1 Nënpar. 1.6 dhe 1.7, lidhur me Nenin 31 të Kodit Penal të RKS.

Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

Ish-presidenti i Jugosllavisë, Sllobodan Millosheviq ishte akuzuar për “krime lufte” dhe për “krime kundër njerëzimit”, të kryera nga forcat serbe e jugosllave në Kosovë. Millosheviq ishte akuzuar për “krime lufte” dhe “krime kundër njerëzimit” të kryera edhe në luftërat në Bosnjë e Hercegovinë, si dhe në Kroaci.

Gjykimi i tij në Gjykatën Ndërkombëtare Penale për ish-Jugosllavinë (ICTY), me seli në Hagë, nuk kishte marrë epilog, pasi Millosheviq kishte vdekur më 11.03.2006 në qeli, teksa po mbahej në paraburgim. Millan Millutinoviq, ish-kryetari i Serbisë, ishte liruar nga akuzat për “krime lufte” gjatë konfliktit në Kosovë. Nikolla Shainoviq, zëvendëskryeministër i Republikës Federale të Jugosllavisë, ishte dënuar me 18 vjet burg për “krime kundër njerëzimit” dhe “shkelje të ligjeve apo zakoneve të luftës”.

Dragolub Ojdaniq, ish-shefi i Shtabit të Përgjithshëm të Ushtrisë jugosllave, ishte dënuar me 15 vjet burg për “krime kundër njerëzimit”.

Nebojsha Pavkoviq, ish-komandanti i Armatës së Tretë të Ushtrisë jugosllave, ishte dënuar me 22 vjet burg për “krime kundër njerëzimit” dhe “shkelje të ligjeve apo zakoneve të luftës”.

Vlladimir Llazareviq, ish-komandanti i Korpusit të Prishtinës të Ushtrisë jugosllave, ishte dënuar me 14 vjet burg për “krime kundër njerëzimit”.

Sreten Llukiq, ish-shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për “krime kundër njerëzimit” dhe “shkelje të ligjeve apo zakoneve të luftës”.

Aktgjykimin të plotë, në gjuhën angleze, e gjeni në link.