Moti në ditët e fundit të marsit dhe fillimit të prillit

Instituti Hidrometeorologjik i Kosovë njofton se ditët e javës së ardhshme do të jenë ditë tipike pranverore.

“Në viset malore me lartësi mbi 900m parashihet që temperaturat minimale të lëvizin rreth zeros, ndërsa në viset e ulëta dhe mesatare temperaturat minimale do të lëvizin ndërmjet 1-4 gradë Celsius, ndërsa maksimalet e ditës parashihen të lëvizin ndërmjet 15-20 gradë Celsius”, thuhet në komunikatën e IHK-së.

Sipas njoftimit vetëm nesër do të ketë reshje të dobëta.

“Fushat me presion të lartë që kanë përfshirë territorin mbeten të stacionuara edhe më tutje mbi vendin tonë, duke kushtëzuar mot relativisht stabil, përjashtuar ditën e hënë ku në pjesën e parë të ditës vende-vende parashihen reshje të intensitetit të dobët”, thuhet tutje aty.

Tutje Instituti ka njoftuar se kushtet biometeorologjike nuk do të jenë të përshtatshme për qytetarët më sëmundje kronike.

“Kushtet biometeorologjike nuk do të jenë të favorshme për një shtresë të popullsisë me sëmundje kronike, kjo si pasojë e qarkullimit të dobët të masave ajrore dhe presionit të lartë atmosferik. Do të fryjë erë nga drejtimi i veriperëndimit dhe jugperëndimit me shpejtësi 1-5 m/s”, thuhet në njoftim.