Mjekët viktima të coronavirusit
Deri më tani në Kosovë kanë vdekur 5 mjekë, si pasojë e virusit COVID-19.
Sylejman Rexhepi, Ali Tolaj, Fadil Zuka, Lulzim Kolgjeraj e Kujtim Zarari, janë mjekët të cilët e kanë humbur betejën me virusin COVID-19.
Mjeku i parë që ka humbur betejën është Fadil Zuka, mjek familjar. Ai i takonte gjeneratës së mjekëve të cilët ishin të persekutuar nga regjimi serb. Në kohët më të vështira kishte shërbyer në Ambulantën e Shoqatës Humanitare “Nëna Terezë” në Viti, pastaj në Pozheran.
Sylejman Rexhepi, mjek internist, remautolog vdiq me 22 korrik. Ai gjatë gjatë periudhës 2002-2003 udhëhoqi studimet pasdiplomike për reumatologji me rehabilitim fizikal. Ishte anëtar i komisionit recensues në dy libra universitar. Ka marrë pjesë në shumë kongrese e simpoziume dhe ka publikuar disa punime shkencore si autor dhe koautor.
Në të njejtën ditë, me 22 korrik, vdiq edhe Ali Tolaj, po ashtu i infektuar me COVID-19. Që nga viti 1996 ka shërbyer si Kirug në Spitalin e Përgjithshëm të Gjakovës, ndërsa gjatë luftës ka shërbyer në ndihmë të Ushtrisë Çlirimtare të Kosovës.
Ditën e djeshme ka vdekur një tjetër mjek. Lulzim Kolgjeraj, 56 vjeçar, mjek familjar, i cili gjithashtu e humbi betejën me COVID-19.
Ai i ka shërbyer shëndetësisë primare në Prizren për rreth tri dekada dhe ka qenë specialist i mjekësisë familjare në QMF në Gjonaj.
Ndërsa ditën e sotme, ka vdekur mjeku i pestë nga COVID-19. 51 vjeçari, Kujtim Zarari, drejtor i QKMF-së në Gjakovë ka vdekur si pasojë e virusit corona. Ai ishte gjithashtu anëtar i Kuvendit të Odës së Mjekëve të Kosovës.
