Mitrovicë, asnjë vrasje më 2019

Drejtoria Rajonale e Policisë e Mitrovicës së Jugut ka prezantuar raportin vjetor të punës për vitin 2019.

Sipas këtij raporti, në rajonin e Mitrovicës së Jugut më 2019 nuk është evidentuar asnjë vrasje.

Drejtoresha rajonale e Policisë. kolonel Afërdita Mikullovci, ka prezantuar të arriturat dhe sfidat me të cilat u përball institucioni i saj gjatë vitit 2019.

Rezultatet e sukseset e arritura, Mikullovci ua dedikoi të gjithë zyrtarëve policorë.

Po ashtu, ajo tha se sukseset janë edhe rezultat i bashkëpunimit të mirë me qytetarët, me komunat si edhe me të gjitha institucionet e tjera relevante.

Policia e Mitrovicës përmes një komunikate ka treguar të arriturat e saj gjatë vitit 2019.

Në këtë raport thuhet se numri i rasteve të përgjithshme ka shënuar  rënie për 12.6%, veprat penale kanë  shënuar rënie për 22%, ndërsa veprat penale kundër jetës dhe trupit kanë shënuar rënie për 4.2%.

Tutje në këtë raport vjetor të Policisë së Mitrovicës thuhet se veprat penale kundër pasurisë kanë shënuar rënie për 20%, vjedhjet për 21%, vjedhjet e rënda për 31%, e vjedhjet në tentativë për  32 për qind.

Ulje për gjithë vitin 2019 sipas Policisë kanë shënuar edhe lëndimet trupore  (për 11.5%), grabitjet për 27%, aksidentet me fatalitet kanë shënuar ulje për 66%.

Ndërsa zbulimi i veprave penale, sipas Policisë, ka arritur mbi 77%.