Miratohet Ligji për Zyrtarët Publikë

Ligji për Zyrtarët Publik është miratuar në parim sot në seancën plenare të Kuvendit të Kosovës.

Nga 62 vota gjithsej, 61 vota ishin për dhe 1 abstenim.

Opozita nuk e ka mbështetur këtë ligj, për shkak të shumë mospajtimeve që kanë lidhur me dispozitat e këtij ligji.

Ministri i Punëve të Brendshme, Xhelal Sveçla ka prezantuar sot në Kuvend Projektligjin për Zyrtarët Publikë.
Ai tha se ky projektligj është pika kyçe për reformën e administratës publike dhe rrjedhimisht adresimin e nevojave të kësaj shoqërie.

Agim Veliu nga Lidhja Demokratike e Kosovës tregoi se kjo parti nuk e përkrah dhe nuk do ta votojë Projektligjin për Zyrtarët Publikë në formën që është.

Ai renditi disa arsye se pse ky projektligj është përpjekje e Qeverisë për të degraduar administratën shtetërore dhe komunale, me theks shërbimin civil.

Sipas Veliut ky projektligj është antikushtetues sepse cenon rëndë të drejtën e punësimit si një prej të drejtave kryesore të njeriut dhe për shkak të përpjekjes së qeverisë për të përvetësuar kompetencën e komunave për të rekrutuar stafin e tyre.

Edhe kryetari i grupit parlamentar të Aleancës për Ardhmërinë e Kosovës ka kërkuar që mos të votohet Projektligji për Zyrtarët Publikë.

Ai me përgjegjësinë më të madhe tha se ky ligj nuk është ligji për zyrtarët publikë por, është ligji i kapjes së administratës shtetërore.

“Ka me godit në thelb funksionimin meritokrsatik të ngritjes në karrierë” – shtoi ai.

Ndërsa, Mërgim Lushtaku, deputet i Partisë Demokratike të Kosovës tha se me Projektligjin për Zyrtarët publikë po shihen qartë shkeljet e mëdha, pretendimet e mëdha që kjo qeveri sipas tij po tenton t`i instaloj në administratën publike.

Sipas Lushtakut kapja praktike e administratës publike nga një parti që ka kritiku partitë e tjera për kapje të administratës, “po bjen vetë aty ku ka kritiku më së shumti”.

Lushtaku tha se si grup parlamentar shprehin shqetësimet e tyre dhe do të kundërshtojnë që ky projektligj të kaloj në këtë seancë.