Ministrja e Arsimit ka kërkuar nga Policia të hetojë rastet e mashtrimeve me diploma

Ministrja e Arsimit, Arbërie Nagavci, ka bërë të ditur se ka dërguar në Polici rastet e mashtrimeve me diploma që u janë bërë studentëve të cilët kanë vijuar studimet në institucionet e arsimit të lartë në Kosovë.

Ministrja ka thënë se studentët të cilët nuk janë regjistruar në librin amëz  “nuk kanë mundur t’i verifikojnë diplomat e tyre për punësim dhe vazhdim të studimeve, për shkak se shumica e tyre, kanë rënë pre e mashtrimeve”.

Nagavci ka njoftuar se përmes një shkrese ka kërkuar nga Policia e Kosovës të njoftohet për procesin e deritanishëm.

“Për këtë arsye, muaj më parë kam kërkuar nga Njësia për Hetimin e Krimeve Ekonomike dhe Korrupsion e Policisë së Kosovës që të zhvillojë hetime në lidhje me këtë çështje”, ka thënë Nagavci.