Ministria e Punëve të Jashtme në Shqipëri dënon sulmet ndaj forcave të sigurisë në Kosovë
Ministrja e Punëve të Jashtme të Shqipërisë, Olta Xhaçka ka thënë se dënojnë sulmet ndaj zyrtarëve të forcave të sigurisë në Kosovë.
Xhaçka ka thënë se i bashkohen thirrjeve të partnerëve ndërkombëtarë për heqjen e menjëhershme të barrikadave nga grupet e serbëve të Kosovës.
“Shqipëria dënon ashpër sulmet ndaj EULEX Kosova dhe në Policinë e Kosovës në veri të Kosovës. Ne i bashkohemi thirrjeve të partnerëve tanë ndërkombëtarë për heqjen e menjëhershme të barrikadave nga grupet e serbëve të Kosovës. Është e rëndësishme të rivendoset qetësia dhe sundimi i ligjit” – ka thënë e para e MPJ-së në Shqipëri.
Albania 🇦🇱 strongly condemns the attacks on @EULEXKosovo and on Kosova Police in the north of 🇽🇰. We join the calls of our international partners for the immediate removal of barricades by groups of Kosova Serbs. It is important to restore calm and rule of law.
— Olta Xhaçka🇦🇱 (@xhacka_olta) December 11, 2022
Një patrullë e EULEX-it është sulmuar me shok-bombë mbrëmjen e djeshme në veri të Kosovës.
Në një njoftim për media, Misioni i Bashkimit Evropian për Sundim të Ligjit në Kosovë dënoi sulmin ndërsa konfirmoi se nga sulmi nuk ka pasur të lënduar.
“Konfirmojmë se një bombë çorientuese (shok-bombë) është hedhur ndaj një patrulle vëzhguese të EULEX-it mbrëmjen e kaluar (10.12) në afërsi të Rudares” – thuhet në njoftim.
EULEX njoftoi se asnjë zyrtar i Njësisë Policore të Specializuar të EULEX-it nuk është lënduar dhe nuk janë shkaktuar dëme materiale.
Ditëve të fundit situata është tensionuar në pjesën veriore të Kosovës. Fillimisht serbët lokal dyshohet të kenë sulmuar zyrën e Komisionit Komunal Zgjedhor pas fillimit të aktiviteteve për mbajtjen e zgjedhjeve që kanë qenë të planifikuara të mbahen më 18 dhjetor, e që më pas u shtynë për 23 prill 2023.
Në zonën veriore të Kosovës, vazhdimisht gjatë kësaj jave ka pasur shok-bomba që janë gjuajtur në vende të ndryshme, e madje edhe ka pasur sulm ndaj njësiteve të Policisë e edhe të gazetarëve.
Informatat nga terreni bëjnë me dije se policët e Kosovës janë të vendosur në pikat e tyre dhe janë duke monitoruar situatën, ndërsa ministri i Punëve të Brendshme njoftoi se në pjesën veriore deri më tani janë vendosur gjashtë barrikada.
Për shkak të vendosjes së këtyre barrikadave, ministri njoftoi se janë mbyllur edhe dy pikat e kalimit kufitar, ajo në Jarinjë edhe në Bërnjak.
Bllokimi i rrugëve ka ardhur pas njoftimit se nga Policia e Kosovës është arrestuar ish-polici Dejan Pantiq.
Sveçla për sulmet ndaj zyrtareve policor tha se u bënë nga grupet kriminale të organizuara.
Ekipi i KALLXO.com vazhdimisht ka qëndruar në këtë zonë dhe ka raportuar për situatën e krijuar atje.