Ministria e Ekonomisë: Shkarkimi i kryeshefit të Trepçës, vendim i pavarur i Bordit
Ministria e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike që udhëhiqet nga Rozeta Hajdari, ka thënë se shkarkimi i kryeshefit ekzekutiv të “Trepçës” ka qenë vendim i pavarur i bordit të përkohshëm.
Dje, Besri Ibrahimi u shkarkua nga postimi i kryeshefit në Trepçë. Në vendimin e bordit të përkohshëm u tha se ajo ishte edhe kërkesë e këshillit protestues.
Qeveria Emëron Kundërligjshëm Anëtarë të Bordit të ‘Trepçës’
Ndërsa, Ibrahimi në një prononcim për KALLXO.com tha se vendimi i bordit ishte politik.
“Por në prononcimin e tij për media, z. Ibrahimi paska akuzuar Ministrinë se ka porositur shkarkimin e tij dhe ka vonuar qëllimisht dhënien e subvencioneve, që janë ndarë me ligjin për buxhetin. Deklarata e tij është e pavërtetë”, thuhet në reagimin e MEPTINIS.
“Ministria në fakt e ka trajtuar ndërmarrjen Trepça ShA me përparësi, duke e vënë para ndërmarrjeve të tjera publike, për shkak të ndjeshmërisë ndaj minatorëve”, thuhet tutje në reagimin e ministrisë së Rozeta Hajdarit.
Ky është reagimi i plotë i ministrisë:
Shkarkimi i kryeshefit të Trepçës, vendim i pavarur i bordit
Dje nga mediat dhe pastaj nga vetë ndërmarrja publike “Trepça” ShA, MEPTINIS është njoftuar se bordi i përkohshëm mbikëqyrës ka shkarkuar kryeshefin ekzekutiv Basri Ibrahimi. Dorëheqja e tij ka qenë kërkesë e këshillit grevist të minatorëve, që janë hedhur në grevë për shkak të vonesës së pagave.
Por në prononcimin e tij për media, z. Ibrahimi paska akuzuar Ministrinë se ka porositur shkarkimin e tij dhe ka vonuar qëllimisht dhënien e subvencioneve, që janë ndarë me ligjin për buxhetin. Deklarata e tij është e pavërtetë.
Ministria në fakt e ka trajtuar ndërmarrjen Trepça ShA me përparësi, duke e vënë para ndërmarrjeve të tjera publike, për shkak të ndjeshmërisë ndaj minatorëve.
Para se të jepen subvencionet, ndërmarrja duhet t’i paraqesë Njësisë për Politika dhe Monitorim të Ndërmarrjeve Publike, pranë Ministrisë, të dhënat për projektet dhe operacionet që do të mbështeten me subvencione. Z. Ibrahimi i ka dorëzuar të dhënat me vonesë. Përkundër kësaj vonese, Njësia për NP ka finalizuar brenda ditës draftin e marrëveshjes për Trepçën. Ministrja Rozeta Hajdari e ka nënshkruar atë menjëherë dhe ka udhëzuar zyrtarët e Ministrisë të bartin mjetet në llogari të ndërmarrjes.
Mirëpo zyrtarët financiarë kanë hasur në pengesa shkaku i mangësive në dokumentacion. Menaxhmenti i ndërmarrjes nuk ka raportuar siç kërkohet për subvencionet e mëparshme, për të siguruar se mjetet janë ndarë sipas marrëveshjes dhe pa diskriminim — si për minatorët në Leposaviq, ashtu për minatorët në Stantërg e në Artanë. Kjo situatë ka detyruar zyrtarët të hetojnë çështjen në hollësi, por nuk ka shkaktuar vonesa të tilla sa për t’u bërë shkas i pakënaqësisë së minatorëve.
Rikujtojmë se ndërmarrja ka keqmenaxhuar subvencionet më parë, kur me paratë e dhëna për rrymë në dhjetor 2019 janë shlyer borxhe të tjera. Në mars 2020, ndërmarrjes i janë dhënë subvencione shtesë për rrogat e minatorëve, ndërsa menaxhmenti ka shënuar gabimisht numrin e xhirollogarisë së ndërmarrjes, duke shkaktuar vonesë në bartje të mjeteve. Në paraqitjen e kërkesës për subvencione, menaxhmenti ka ngatërruar operatorët e energjisë KEK dhe KEDS, duke krijuar përshtypje të gabuar për detyrimet ndaj këtyre operatorëve.
Joprofesionalizmi në komunikim gjatë përgatitjes së marrëveshjes së re për subvencione është vazhdimësi e shkeljeve dhe gabimeve të së kaluarës. Kurse vendimi i bordit të përkohshëm mbikëqyrës është vendim i pavarur, për të cilin Ministria është njoftuar tek pas marrjes së tij.