Ministria e Bujqësisë: Vetëvendosje ushtroi kallëzim penal për poena politike
Ministria e Bujqësisë, Pylltarisë dhe Zhvillimit Rural, ka reaguar pas kallëzimit penal të Lëvizjes Vetëvendosje për keqpërdorimet me subvencione bujqësore në këtë ministri.
Në komunikatën e lëshuar për media, kjo ministri thotë se i gjithë procesi është transparent dhe bëhet duke u respektuar rregullat e aplikimit.
“I gjithë procesi për mbështetjen e fermerëve në kuadër të këtyre programeve, që nga shpallja e thirrjeve dhe vlerësimi i të gjitha aplikacioneve për grante dhe subvencione bëhet bazuar në dokumentacionin, procedurat dhe kriteret e parapara me program, të cilat çdo vit publikohen në faqen e Ministrisë së Bujqësisë dhe në atë të Agjencisë për Zhvillimin e Bujqësisë (AZHB). Po ashtu, AZHB-ja e bënë edhe informimin e fermerëve përmes mesazheve dhe vendimeve me email, si dhe përmes ueb-faqes së AZHB-së për rezultatet lidhur me procesin”, thuhet në komunikatë.
Tutje ministria ka bërë të ditur që ka rënë numri i ankesave të fermerëve për parregullsi në procesin e ndarjes së subvencioneve bujqësore.
“MBPZHR-ja njofton se ka rënë edhe numri i ankesave të fermerëve të adresuara në MBPZHR dhe AZHB lidhur me procesin e përfitimit të subvencioneve dhe granteve investive”, thuhet tutje në komunikatë.
Ministria e Bujqësisë në komunikatën e saj ka theksuar se të gjitha këto veprime po bëhen për të njollosur punën e kësaj ministrie.
“Prandaj, këto procese dhe mbarëvajtjen e ndarjes së mbështetjes financiare për fermerët nuk mund ta njollos asnjë tendencë politike, përkundër përpjekjeve paraelektorale që subjektet politike mund t’i kenë”, thuhet tutje aty.
Këtë kallëzim e dorëzoi deputeti i Lëvizjes Vetëvendosje, Sali Zyba, ndërsa siç bëhet e ditur në komunikatë, ky kallëzim është bërë për shkak të keqpërdorimeve në subvencione si dhe keqpërdorimeve të tjera të parasë publike nga këta ministra.
“Kallëzimi i sotshëm i mbulon dy çështje, grantet në shumën 4 milionë euro të dhëna për 4 konzurciome dhe një kompani secila prej tyre e lidhur drejtpërdrejtë me drejtues politikë dhe ish ministra si dhe keqpërdorimet prej vitit 2014 në këtë fushë. Vitin e fundit në Ministrinë e Bujqësisë u sajua një masë e veçantë, në shpërputhje të plotë me vet kriteret e kësaj ministrie. Mandej edhe këto kritere ilegjitime të bëra publike për këtë masë fiktive, nuk u morën parasysh”, thuhet në njoftimin e VV-së.