Ministri Sveçla inauguroi në Zubin Potok objektin e Qendrës nacionale për trajnim në fushën e kërkim-shpëtimit

Ministri i Punëve të Brendshme, Xhelal Sveçla, bashkë me drejtorin e Agjencisë së Menaxhimit të Emergjencave, kanë inauguruar të premten, më 07.02.2025, objektin e Qendrës nacionale për trajnim në fushën e kërkim-shpëtimit.

Sipas ministrit Sveçla, objekti i Qendrës nacionale për trajnim në fushën e kërkim-shpëtimit ndodhet në Zubin Potok, buzë liqenit të Ujmanit.

“Këtë javë, me kënaqësi kam nënshkruar vendimin përmes së cilit i kam hapur udhë funksionalizimit të komponentës së kërkim shpëtimit brenda Agjencisë së Menaxhimit të Emergjencave” – ka shkruar Sveçla në Facebook më 07.02.2025.

Svçela ka pretenduar se objektin e Qendrës nacionale për trajnim në fushën e kërkim-shpëtimit e kanë gjetur të pashfrytëzuar.

“Me investimin tonë që kap shifrën rreth 990 mijë euro, objekti është sanuar dhe do të jetë në shfrytëzim të kuadrove të AME-së që do të trajnohen e profilizohen në fushën e kërkim shpëtimit në ujë dhe mal” – ka shtuar Sveçla.

Kurse, mëngjesin e datës 07.02.2025, Sveçla ka thënë se kanë filluar me ndarjen e dy kamionëve për Agjencinë e Menaxhimit të Emergjencave me të cilët zjarrfikësit do të kenë mundësinë e intervenimit në objekte të larta e distanca të mëdha.