Ministri e gjen Shpellën e Gadimes 'në gjendje të mjerueshme'

Ministri i Mjedisit dhe Planifikimit Hapësinor, Fatmir Matoshi, ka vizituar sot Shpellën e Gadimes.

Gjatë kësaj vizite Matoshi i pakënaqur me infrastrukturën e Shpellës së Gadimes ka thënë se  Ministria të cilën ai e udhëheq, shumë shpejtë do të fillojë me projekte që kanë për qëllim përmirësimin e infrastrukturës në Shpellën e Gadimes.

“Ka pasur mungesë të investimeve të mirëmbajtjes të shpellës dhe në infrastrukturën përreth saj. Është për keqardhje dhe e turpshme që 20 vjet pas luftës nuk ka tualete për vizitorë tek Shpella e Gadimes dhe ne kemi bërë hapat konkretë për këtë. Javën e ardhshme fillon ndërtimi i tualeteve për t’u krijuar kushte vizitorëve që të jenë më të rehatshëm”, ka thënë Matoshi.

Ai ka bërë të ditur se gjatë këtij viti do të investohet edhe në rregullimin e ndriçimin brenda Shpellës së Gadimes.

“Në një pjesë të shpellës kemi problemin e ndriçimit të cilin e kemi adresuar dhe do ta zgjidhim përgjatë këtij viti zgjerimin e rrjetit të ndriçimit brenda shpellës. Po ashtu brenda saj kemi dalje të ujërave që e bëjnë të pamundshme vizitat në disa sektorë të shpellës. Po ashtu edhe për këtë po gjejmë zgjidhje”, ka deklaruar Matoshi.

Përveç këtyre investimeve, ministri ka treguar se Shpella e Gadimes shumë shpejt do të plotësohet me stafin e saj.

“Kjo është një shpellë që menaxhohet nga MMPH-ja, ka pasur defekte të shumta në të kaluarën edhe në mënyrë të funksionimit të saj. Tashmë jemi në fazën përfundimtare të kompletimit të shpellës me staf të mjaftueshëm që tu dalim në mbështetje vizitorëve që janë të shumtë që vijnë ta shohin një prej bukurive kryesore që ka vendi ynë”, tha Matoshi.