Ministrja e Drejtësisë, Albulena Haxhiu duke hyrë në hotelin Sharr - Prevallë - 29.02.2020
Ministrat e qeverisë Kurti, arrijnë në Prevallë
Partnerët e koalicionit LVV dhe LDK sot do ta kalojnë gjithë ditën në një mbledhje në një nga hotelet e Prevallës.
KALLXO.com është në Prevallë dhe tashmë ministrat e kabinetit kanë filluar të arrijnë në hotelin ku do të mbahet ky takim.
Në mbledhjen e djeshme të Qeverisë, kryeministri Albin Kurti e njoftoi kabinetin e tij për mbledhjen e nesërme, që pritet të zgjasë gjatë gjithë ditës.
Ai u bëri ftesë vartësve të tij, që të shtunën ta rezervojnë për mbledhjen e kabinetit qeveritar.
“Mbledhja e nesërme gjithëditore, ku draft-programi qeverisës të përgatitur nga zyra e planifikimit strategjik ta shndërrojmë në version përfundimtar të programit tonë qeverisës në një plan të punës e të aksionit me të cilit do ta realizojmë orientimin e ri të qeverisë së Kosovës, votuar me 3 shkurt të këtij viti. Është mirë që të gjithë ministrat, i gjithë kabineti, 2 zëvendëskryeministrat ta lënë gjithë ditën e nesërme të lirë për këtë mbledhje shumë të rëndësishme”, tha Kurti para kabinetit të tij.
Ky takim i sotëm i partnerëve të koalicionit, nuk do të mbahet në ndërtesën e Qeverisë, por në një vend tjetër.
Zëvendëskryeministri nga radhët e LVV-së, Haki Abazi e ka konfirmuar për KALLXO.com se ky takim do të mbahet në një nga hotelet e Prevallës.
“Takimi i nesërm gjithë ditor i kabinetit qeveritar ka me u mbajtë në hotelin Sharr në Prevallë”, tha Abazi për KALLXO.com.
Abazi e ka konfirmuar se plani i punës veprues që pritet të diskutohet nesër, do të shkojë në Kuvendin e Kosovës për diskutim.