Memli Krasniqi merr pjesë në lutjet e mëngjesit në Uashington DC

Kryetari i Partisë Demokratike të Kosovës, Memli Krasniqi në kuadër të vizitës së tij zyrtare në Washington DC, ka marrë pjesë në takimin tradicional të mëngjesit të lutjeve, që mbahet çdo të enjte në Kongresin Amerikan.

Përmes një postimi në Facebook, Krasniqi ka falënderuar kongresmenët për rëndësinë e veçantë që i kushtojnë Kosovës në kuadër të angazhimit të tyre.

“Rreth 20 kongresmenë me përvojë, të cilët u kthyen në Kongres pas zgjedhjeve të mesit të mandatit që u mbajtën javën e kaluar në SHBA, i falënderova për rëndësinë e veçantë që i kushtojnë Kosovës dhe popullit tonë në punën e tyre” – është shprehur ai.

Në bisedat me kongresmenët nga South Carolina, Michigan, Texas dhe Virginia, kreu i PDK-së është shprehur se koordinimi dhe bashkëpunimi me SHBA-në në arritjen e aspiratave drejt integrimit është i pa alternativë.

“Në biseda shumë miqësore, në mënyrë të veçantë me kongresmenët Joe Wilson nga South Carolina, Tim Walberg e John Moolenar nga Michigan, Louie Gohmert nga Texas, Juan Vargas nga California dhe Bob Good e Ben Cline nga Virginia, shpreha qëndrimin e vendosur të popullit të Kosovës që, pas sukseseve që kemi arritur së bashku deri më sot përmes koordinimit dhe bashkëpunimit, rrugëtimi ynë përpara drejt aspiratave të fuqizimit dhe integrimit nuk ka alternativë tjetër”, ka thënë Krasniqi teksa ka falënderuar SHBA-në për rolin e tyre në krijimin dhe ndërtimin e Kosovës.

“Populli i Kosovës është falënderues ndaj SHBA-ve për rolin e tyre në krijimin dhe ndërtimin e shtetit tonë dhe miqësinë e ndërtuar ndër vite jemi të përkushtuar që ta mbrojmë dhe ta kultivojmë përjetësisht”, ka thekusar ai.

Në vizitë në Shtetet e Bashkuara të Amerikës është edhe kryetari i Lidhjes Demokratike të Kosovës (LDK)Lumir Abdixhiku, i cili dje ka njoftuar se në Kongres është pritur nga Kongresmeni demokrat Ritchie Torres, njëkohësisht bashkëkryesues i Grupit për Shqiptarët në Kongresin Amerikan.