Më 9 janar do të fillojë votimi nga jashtë vendit

Nga nesër, më 09.01.2025, do të fillojë votimi për votuesit e regjistruar jashtë vendit për Zgjedhjet e përgjithshme 2025.

Lajmin e bëri të ditur Kryetari i Komisionit Qendror Zgjedhor (KQZ) në mbledhjen e mbajtur më 08.01.2025.

Më 06.01.2025 janë përcaktuar numrat e partive politike, që do të jenë pjesë e garës për Zgjedhjet e rregullta parlamentare, më 9 shkurt 2025.

Përmes shortit në Zgjedhjet e 9 Shkurtit Lëvizja Vetëvendosje (LVV) do të ketë numrin 118, Lidhja Demokratike e Kosovës (LDK) 124, Partia Demokratike e Kosovës (PDK) 131, ndërsa Koalicioni AAK-NISMA-Lista Konservatore-Forumi Intelektual 137.

KQZ e ka certifikuar më 04.01.2025 listën përfundimtare të votuesve brenda dhe jashtë Kosovës dhe ka bërë të ditur se 2 milionë e 75 mijë e 868 votues do të kenë të drejtë vote në Zgjedhjet e rregullta parlamentare më 9 shkurt.

Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

Sipas vendimit të fundit të KQZ-së, procesi i votimit do të zhvillohet në 17 Ambasada dhe 15 Konsullata, në 19 shtete të ndryshme të botës.

Në total, në Zgjedhjet e 9 shkurtit 2025 do të garojnë 27 parti politike.

Prej tyre 19 janë parti politike, pesë koalicione, dy nisma qytetare dhe një kandidat i pavarur.

Zgjedhjet parlamentare të 9 shkurtit 2025 përbëjnë procesin e parë të rregullt zgjedhor në Kosovë, pas shpalljes së pavarësisë më 2008.

Numrat e partive politike për Zgjedhjet e 9 shkurtit