Mbyllen hetimet për rastin e polices në Gjilan e cila vrau familjen e saj dhe veten

Prokuroria Themelore në Gjilan ka njoftuar se ka mbyllur hetimet për vrasjen e familjes Bllaca në Gjilan.

Prokuroria në Gjilan ka njoftuar se në bashkëpunim me Policinë ka zhvilluar veprime hetimore intensive, me ç’rast nga të gjitha veprimet e ndërmarra është vërtetuar se vrasjet e anëtarëve të familjes Bllaca, nuk janë shkaktuar nga veprimet inkriminuese të personave tjerë, qoftë me shtytje, ndihmë ose bashkëkryerje.

“Sipas raporteve të autopsisë, të gjitha vdekjet janë të dhunshme, të cilat kanë ardhur si pasojë e plagëve të shkaktuara nga arma e zjarrit. Nga Instituti i Psikiatrisë Forenzike është kërkuar ekspertizë për gjendjen e tani të ndjerës V.B., sipas së cilës është konstatuar se e ndjera ka vuajtur nga çrregullimi i personalitetit paranoid, prandaj edhe nuk i është lejuar mbajtja e armës dhe i është rekomanduar ndërrimi i vendit të punës”, thuhet në njoftim.

Sipas Prokurorisë, se viktima V.B., me armë zyrtare ka kryer vrasjet e familjarëve dhe më pas ka kryer vetëvrasjen vërtetohet nga deklaratat e dëshmitarëve, ekzaminimet e dëshmive nga vendi i ngjarjes, raportet e autopsive, ekzaminimet e telefonave, ekzaminimet e dorëshkrimeve, ekzaminimet e raporteve mjekësore, raportet e këqyrjes së vendit të ngjarjes, video incizimet dhe nga prova të tjera të siguruara nga prokurori i shtetit.

Me 19 shkurt, një pjesëtare e Policisë së Kosovës, Valdete Bllaca dyshohet se vrau katër persona, prindërit e saj, dhe dy vëllezërit, dhe pastaj kishte bërë vetëvrasje.

Tragjedia e Gjilanit: Polices i ishte marrë revolja në korrik të vitit 2017