Mbrojtja e Thaçit ankohet lidhur me qartësinë e dokumenteve nga Prokuroria

Në Gjykatën Speciale në Hagë sot po vazhdon seanca e rradhës ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit,

Mbrojtësi i Hashim Thaçit, avokati David Hooper  tha se ata po kërkojnë nga Prokuroria nxjerrjen e materialeve në mënyrë të rregullt dhe të renditur pasi po kanë vështirësi për shkak të mos renditjes së deklaratave të dëshmitarëve.

Ai po ashtu theksoi se “nuk po bëjnë teatër”

“ Kërkojmë nga Prokuroria të na jap një tabelë me numrat ERN që lidhet me secilin dëshmitar. Prokuroria e akuzon mbrojtjen e Thaçit për teatër unë nuk jam person që bëjë gjeste teatrale, mocioni ynë ka dalë nga fakti se në nuk jemi ta kënaqur me mënyrën se si po nxjerren materialet, sepse është bërë në mënyrë rastësore dhe jo në mënyrë të duhur. Në themi që kjo nuk është mënyra e duhur e nxjerrjes së materialeve. Ne nuk po kundërshtojmë dhe po themi se kemi vështirësi dhe kërkesa jonë në lidhje me masat për dhënien e të gjitha dokumenteve lidhur me një dëshmitar, kërkojmë që kjo praktikë të bëhet në të ardhmen…e theksoj edhe një herë nuk po bëjë teatër kjo lind nga pakënaqësia se Prokuroria nuk po i trajton çështjet që po kërkojmë ne “, tha Hooper.

Gjithashtu avokati Hooper ka kërkuar një listë paraprake të dëshmitarëve.

“ Ne sugjeruam që të kemi një listë paraprake të dëshmitarëve, e dyta lidhja e dokumenteve me dëshmitarët, janë 3 mijë dokumente dhe disa prej tyre nuk kanë një numër të caktuar, Prokuroria thotë se disa prej tyre janë se ato i nënshtrohen redaktimeve por unë se kuptoj këtë sepse lidhja e dokumenti me një numër nuk nënkupton ndonjë gjë. Prandaj kërkojmë që Prokuroria të ri paraqes këto dokumente dhe t’i lidh me dëshmitarët përkatës “, tha Hooper.

Hashim Thaçi, Kadri Veseli, Jakup Krasniqi dhe Rexhep Selimi po akuzohen se si drejtues të UÇK-së kishin kryer krime kundër njerëzimit gjatë luftës së fundit në Kosovë.

Për këto akuza ata po mbahen në paraburgim prej momentit kur ishin arrestuar në Kosovë.

Të gjitha krimet që Prokuroria pretendon se ishin kryer janë mohuar nga katër krerët e UÇK-së.

Ata po akuzohen se ndërmjet marsit 1998 dhe shtatorit 1999 kishin kryer krime të luftës dhe krime kundër njerëzimit, duke arrestuar dhe ndaluar persona civilë në mënyrë të paligjshme, duke i trajtuar në mënyrë mizore, torturuar dhe zhdukur.Në mesin e shumë akuzave bëjnë pjesë edhe ato të vrasjeve të paligjshme.

Për të gjitha këto krime të pretenduara, prokurori Jack Smith i ngarkon Hashim Thaçin, Rexhep Selimin, Jakup Krasniqin e Kadri Veselin të cilët sipas tij ishin në dijeni se këto krime ishin duke ndodhur dhe nuk kishin ndërmarrë asnjë veprim për parandalimin e tyre mirëpo kishin nxitur kryerjen e tyre.

Në këtë aktakuzë thuhet se Thaçi dhe të tjerët nxitën sulmet ndaj kundërshtarëve dhe nxitën vrasjen e tyre.

Sipas Prokurorisë, krerët e UÇK-së përmes deklaratave publike dhe veprimeve në terren, frikësuan, denigruan, eliminuan kundërshtarë dhe kërkuan të pozicionoheshin si i vetmi zë dhe si i vetmi përfaqësues legjitim i shqiptarëve të Kosovës.

Pjesë e aktakuzës 68-faqëshe të Prokurorisë janë edhe pretendimet për vrasje të paligjshme.

Këto vrasje theksohet se janë kryer në territore të ndryshme të Kosovës dhe Shqipërisë. Sipas Prokurorisë ato janë kryer në Likoc, Jabllanicë, Llapushnik, Drenoc, Malishevë, Bajgorë, Majac, Zllash, Kleҫkë, Kukës dhe Rahovec.

Në aktakuzë thuhet se një person gjatë vitit 1998 ishte mbajtur në kazermat e UÇK-së në Jabllanicë dhe ishte rrahur për vdekje nga pjesëtarët e UÇK-së.Aktakuza pretendon se fatin e njëjtë e kishin pasur edhe dy viktima të tjera të cilat ishin dërguar në kazermën e UÇK-së në Jabllanicë.

Përpos vrasjeve në Jabllanicë në aktakuzë pretendohet se në fshatin Llapushnik ishte arrestuar një person nga pjesëtarët e UÇK-së ishte rrahur dhe ishte marrë në pyetje dhjetë net rresht ndërsa në fund ishte vrarë.

Aktakuza tutje pretendon se pas një ofensive serbe, forcat e UÇK-së në Llapushnik kishin arrestuar afërsisht 30 persona, ku disa prej tyre më pas ishin lënë të lirë ndërsa të tjerët ishin qëlluar dhe vrarë.

Aty përshkruhet edhe për gjashtë vrasje të kryera në Drenoc.

Sipas Prokurorisë gjashtë burra ishin arrestuar, rrahur dhe vrarë dhe eshtrat e tyre nuk ishin parë më kurrë.

Pjesë e aktakuzës janë edhe akuzat për vrasjen e 11 civilëve serbë në Malishevë.

Sipas aktakuzës në korrik të vitit 1998 një grup prej 11 të arrestuarish serbë u transferuan në një dhomë në bodrumin e një ndërtese në Malishevë.

Aty përshkruhet se këta civilë ishin rrahur dhe shqelmuar nga anëtarët e UÇK-së, e më pas ishin qëlluar dhe vrarë.

Prokuroria e Specializuar në këtë aktakuzë ka përfshirë edhe qendrën e paraburgimit në Kleçkë.

Në këtë lokacion sipas Prokurorit të Specializuar, gjashtë persona ishin dërguar dhe ishin rrahur për vdekje nga anëtarët e UÇK-së.

Një tjetër person sipas Prokurorit të Specializuar kishte vdekur si rezultat i keqtrajtimit në Kukës. Në këtë keqtrajtim thuhet se kishte marrë pjesë edhe Sabit Geci.

Tre persona të tjerë ishin arrestuar në Rahovec, ata sipas aktakuzës ishin rrëmbyer nga ushtarët e UÇK-së në shtëpitë e tyre ndërsa nuk ishin parë më kurrë.

Arsyeja se pse krerët e UÇK-së akuzohen për krimet dhe vrasjet e sipërpërmendura sipas Prokurorit të Specializuar është përgjegjësia komanduese.