Mbrohet tema e parë e diplomës në mënyrë virtuale në UP

Besnik Emërllahu, tashmë ka marrë titullin Inxhinier pasi ditë më parë, me temën “Diagonstikimi kompjuterik i sistemeve të automjeteve në autoservisin “Fatoni”, diplomoi në Fakultetin e Inxhinierisë Mekanike në Universitetin e Prishtinës “Hasan Prishtina”.

Kështu, ai u bë studenti i parë që  në UP temën e diplomës arriti ta mbrojë në mënyrë virtuale.

Sipas një komunikate për nga universiteti, kjo formë e re e diplomimit, erdhi pasi UP-ja mori vendim që temat e diplomës të studentëve të mbrohen përmes platformave online, pas situatës së krijuar nga virusi COVID- 19.

Besniku thotë se kjo metodë është aq e mirë sa që duhet të përdoret edhe pas daljes nga karantina.

“Kjo metodë duhet të gjejë aplikim edhe pas kësaj pandemie sepse për studentët është më e lehtë, pasi që studenti është më pak i stresuar dhe ndjehet më lirë në mënyrën e të shprehurit”, tregon ai.

Këtë ceremoni e nisi dekani i FIM-it, Ahmet Shala dhe sipas procedurave mbrojtja u bë para komisionit i cili u përbë nga: prof. dr. Ilir Doçi (kryetar), prof. dr. Arbnor Pajaziti (mentor-anëtar) dhe prof. ass. ar. Ramadan Duraku (anëtar).

UP ka njoftuar se kjo mënyrë e diplomimit ka nisur për nivelin baçelor, por pritet të vazhdohet edhe me atë master, me qëllim që të u mundësohet studentëve diplomimi në kohë.

Më 13 mars Qeveria e Kosovës kishte vendosur që të ndalet i gjithë procesi mësimor në të gjitha institucionet arsimore të Kosovës, si masë parandaluese për përhapjen e COVID-19.

Kurse, UP-ja kishte marrë inicativën që ligjëratat të mbahen online me studentët. Deri më tani, në vendin tonë janë 227 raste me coronavirus, 38 të shëruar dhe 7 të vdekur.