Lirohet kosovari që ishte arrestuar nga autoritetet serbe
Është liruar Abaz Beqiraj, personi i cili para dy ditëve ishte arrestuar nga autoritetet serbe në kufirin Serbi-Hungari.
Kështu ka njoftuar avokati i Beqirajt, Arianit Koci.
“Abaz Beqiraj, personi që është arrestuar të dielën nga policia serbe, posa është liruar”, ka thënë avokati.
KALLXO.com kishte raportuar lidhur me rastin.
Ministria e Punëve të Jashtme dhe Diasporës kishte reaguar ditën e arrestimit të Beqirajt.
Në një njoftim nga ana e MPJD-së ishte thënë se Zyra Ndërlidhëse e Republikës së Kosovës në Beograd kishte vendosur kontaktin me autoritetet serbe dhe se ishte në përpjekje për të sqaruar rrethanat.
Nipi i personit të arrestuar, Arlind Beqiraj, kishte thënë për KALLXO.com se ngjarja ka ndodhur pasi Policia serbe po pretendonte se i arrestuari ka një vepër penale të vitit 2010.
“Është ndalu kinse e ka një vepër penale në vitin 2010”, kishte thënë Beqiraj për KALLXO.com.
Tutje ai kishte treguar se familja e të arrestuarit kanë tentuar të kontaktojnë me Ministrinë e Punëve të Jashtme, mirëpo të njëjtët nuk ia kanë hapur telefonin.
“Kemi tentu me telefonu me Ministrinë e Punëve të Jashtme, por nuk e kanë hapur telefonin”, pati thënë Beqiraj.
Sipas tij, familjari i tyre është në paraburgim.
KALLXO.com kishte kontaktuar me kompaninë me të cilën ishte duke udhëtuar i arrestuari.
Pronari i kompanisë “Try Tours”, Shaqë Fetaj, kishte thënë se pasagjerin e kanë ndaluar lidhur me një pengesë ligjore që e ka pasur para 12 viteve.
“E kanë ndalu lidhur me një rast të vitit 2010. Diçka tjetër nuk na kanë thanë, ata i kanë procedurat e veta”, kishte thënë Fetaj.
Detaje nga arrestimi i një shtetasi të Kosovës nga autoritetet serbe
