Foto: Urim Krasniqi/KALLXO.com
Lirohet Dardan Molliqaj
Kryetari Partisë Socialdemokrate, Dardan Molliqaj, është liruar pasi u arrestua dje për 48 orë nga Policia e Kosovës.
Molliqaj u arrestua pas një aksioni që zhvilloi bashkë me disa aktivistë të tjerë të PSD-së kundër një vendimi të Ministrisë së Infrastrukturës.
Lajmin për lirimin e Molliqajt e dha Natyra Kuçi, anëtare e PSD-së.
“Pas presionit të madh publik, është liruar nga burgu kryetari i PSD-së Dardan Molliqaj.
Kundërshtimi ndaj zhvatjes që ka filluar pushteti nuk ndalet. Përndjekja e pushtetit ndaj opozitës nuk e ndal kritikën e aksionin. Së bashku mund të krijojmë të renë demokratike si kundërpërgjigje ndaj autoritarizmit të Kurtit”, shkroi ajo në Facebook.
Aktivistët e Partisë Socialdemokrate (PSD) janë arrestuar dje gjatë aksionit të tyre për të kundërshtuar marrëveshjen për ofrimin e tiketës ngjitëse me qëllim të konfirmimit të kontrollimit teknik të automjeteve.
Disa orë pas arrestimit të aktivistëve të PSD-së, Qeveria ishte shprehur e shqetësuar nga pamjet e dhunës sot gjatë aksionit të PSD-së.
Në anën tjetër, Inspektorati Policor i Kosovës ka njoftuar se gjatë ditës së djeshme është suspenduar komandanti i operacionit policor gjatë arrestimit të aktivistëve të PSD-së.
Siç njofton IPK, ndaj të njëjtit është iniciuar edhe procedura administrative për përgjegjësi komanduese.