Liderët botërorë mblidhen për ta hartuar 'Planin Marshall' për rindërtimin e Ukrainës
Sot është dita e 131 e pushtimit rus të Ukrainës – lufta e parë e madhe tokësore në Evropë në dekada.
Rusia ka dërguar dhjetëra mijëra trupa në Ukrainë më 24 shkurt të këtij viti me qëllim të degradimit të kapaciteteve ushtarake të Ukrainës dhe të çrrënjosjes së njerëzve që i ka quajtur nacionalistë të rrezikshëm. Forcat ukrainase janë përgjigjur me rezistencë të ashpër ndaj luftës.
Perëndimi ka vendosur sanksione të pashembullta ndaj Rusisë me qëllim që kjo e fundit të tërhiqet nga lufta mirëpo kur kjo nuk ndodhi atëherë Perëndimi, i udhëhequr nga SHBA dhe Britania e Madhe kanë nisur me armatosjen e Ukrainës me armë dhe logjistikë të ndryshme përfshirë edhe raketat e prodhimit më të ri.
Rusia e sheh ndihmën ushtarake të perëndimit si një përfshirje në këtë luftë dhe zotohet se do të përgjigjet ndaj cilitdo reagimi ushtarak.
Në ndërkohë zhvillimet më të fundit gjatë natës dhe ditës së djeshme në luftën e Ukrainës janë si në vijim:
Forcat ukrainase janë tërhequr nga Lysychansk pasi Rusia pretendon se tani është nën kontrollin e rajonit lindor të Ukrainës Luhansk. Ministri rus i mbrojtjes, Sergei Shoigu, tha se forcat e Moskës kishin vendosur “kontroll të plotë” mbi Lysychansk dhe disa vendbanime aty pranë. Komanda ushtarake e Ukrainës konfirmoi të dielën në mbrëmje se trupat e saj ishin detyruar të tërhiqeshin nga qyteti, duke thënë se përndryshe do të kishte “pasoja fatale”. Lysychansk ishte qyteti i fundit i kontrolluar nga ukrainasit në rajonin e Luhansk.
Presidenti i Ukrainës, Volodymyr Zelenskiy, u zotua ta rimarrë Lysychanskun me ndihmën e armëve perëndimore me rreze të gjatë veprimi. “Ne do të kthehemi falë taktikave tona, falë rritjes së furnizimit me armë moderne. Ukraina nuk heq dorë nga asgjë”, tha ai në një video-fjalim të mbrëmjes.
Qyteti lindor i Ukrainës, Sloviansk, në rajonin e Donetskut, u godit nga bombardime të fuqishme nga raketahedhës të shumtë të dielën, duke vrarë gjashtë persona dhe duke plagosur 20 të tjerë, tha kryetari i bashkisë së qytetit Vadim Lyakh. Në kryeqytetin rajonal të Kramatorsk pas vitit 2014, një raketë shkatërroi një hotel, sipas kryebashkiakut të tij Oleksandr Goncharenko. Ai tha se tri raketa goditën qytetin të dielën dhe se nuk ka pasur viktima të raportuara deri më tani.
Të paktën tre persona u vranë dhe dhjetëra ndërtesa banimi u dëmtuan në qytetin rus të Belgorod pranë kufirit me Ukrainën të dielën, tha guvernatori i rajonit. Vyacheslav Gladkov tha se të paktën 11 ndërtesa banimi dhe 39 shtëpi banimi private u dëmtuan, duke përfshirë pesë shtëpi të shkatërruara.
Australia do të dërgojë më shumë se 100 milionë dollarë ndihmë të re në Ukrainë, duke përfshirë pajisje ushtarake, si dhe do t’i barazojë sanksionet ndaj 16 zyrtarëve të rinj rusë, pas udhëtimit të fshehtë të kryeministrit Anthony Albanese në Kiev. Albanese vizitoi qytete Bucha, Hostomel dhe Irpin, tri qytete në rajonin e Kievit ku u zbuluan prova të vrasjeve masive dhe torturave pas tërheqjes së forcave ruse.
Britania do të jetë nikoqir i një konference të rimëkëmbjes 2023 për ta ndihmuar Ukrainën të rindërtohet nga dëmet e shkaktuara nga pushtimi rus. Konferenca e Rimëkëmbjes së Ukrainës (URC2022) do të fillojë të hënën në Lugano, Zvicër, për të diskutuar se si të rindërtohet Ukraina, duke sjellë së bashku një delegacion ukrainas me përfaqësues të vendeve të tjera, organizatave ndërkombëtare dhe shoqërisë civile, tha zyra e jashtme e Mbretërisë së Bashkuar.
Mbretëria e Bashkuar mund ta ndjekë shembullin e Kanadasë dhe t’i konfiskojë asetet e rusëve në Britani për t’ia dhënë Ukrainës. Sekretarja e Jashtme, Liz Truss, u tha deputetëve se ishte mbështetëse e idesë që qeveria mund t’i konfiskonte asetet e ngrira ruse në Mbretërinë e Bashkuar dhe t’i rishpërndajë ato për viktimat e luftës ruse në Ukrainë.
Një hetim i ri i Neë York Times ka zbuluar se referencat e nazizmit u rritën në nivele rekord ditën kur Rusia e pushtoi Ukrainën. Gazeta anketoi tetë milionë artikuj rreth Ukrainës të mbledhura nga mbi 8,000 faqe interneti ruse që nga viti 2014 dhe zbuloi se që nga viti 2014, referencat ndaj nazizmit ishin “relativisht të sheshta për tetë vjet dhe më pas u rritën në nivele të paprecedentë më 24 shkurt” të këtij viti.
Presidenti i Bjellorusisë dhe aleati më i ngushtë i Vladimir Putinit ka thënë se ish-shteti i tij sovjetik qëndron plotësisht pas Rusisë, duke shtuar se Bjellorusia “ka praktikisht një ushtri të unifikuar”. Alexander Lukashenko tha se ka qenë mbështetës i fushatës së Putinit kundër Ukrainës “që nga dita e parë” në fund të muajit shkurtit. “Ne jemi duke u kritikuar se jemi i vetmi vend në botë që po e mbështet Rusinë në luftën e saj kundër nazizmit,” ka deklaruar Lukashenko gjatë një tubimi i transmetuar nga agjencia shtetërore të lajmeve BelTA. “Ne do të qëndrojmë së bashku me Rusinë vëllazërore.”
Autoritetet doganore turke e kanë ndaluar një anije ruse mallrash që transportonte drithë të dyshuar të vjedhur nga Ukraina, ka thënë ambasadori ukrainas në vend. “Ne kemi një bashkëpunim të plotë. Anija është aktualisht në hyrje të portit, ajo është ndaluar nga autoritetet doganore të Turqisë”, tha ambasadori Vasyl Bodnar në televizionin kombëtar ukrainas./The Guardian
Përgatiti: Nuhi Shala
