Foto: Urim Krasniqi/KALLXO.com
LDK-ja në Prizren thotë se kanë pritur të jenë në balotazh
Lidhja Demokratike e Kosovës (LDK) në Prizren ka pasur pritshmëri se në zgjedhjet e së dielës së kaluar do të arrijnë të shkojnë në balotazh.
Por në fakt, sipas rezultateve preliminare të KQZ-së, LDK-ja renditet e treta në këtë Komunë, pas LVV-së dhe PDK-së.
Kandidati i LDK-së për kryetar të Prizrenit Anton Quni ka siguruar 8 mijë e 705 vota apo 14.98 për qind. Prizreni pritet të shkojnë në balotazh, mes kandidati për kryetar Mytaher Haskukës së LVV-së dhe Shaqir Totajt të PDK-së.
KALLXO.com të mërkurën dhe të enjten ka provuar të marr një qëndrim nga kandidati i LDK-së për kryetar të Prizrenit, Anton Quni, por ai nuk e ka hapur telefonin dhe as nuk është përgjigjur në pyetjet që i janë dërguar me shkrim.
Ndërkaq, nënkryetari i Degës së LDK-së në Prizren, Hatim Baxhaku ka thënë për KALLXO.com se kanë pasur pritshmëri për balotazh, duke shtuar se i pranojnë rezultatet zgjedhore.
“Ne kemi pritur se do të jemi në balotazh, por janë rezultatet janë ato që janë dhe të cilat i pranojmë ashtu sepse ashtu ka vendosur populli. Përndryshe ne kemi pritur, edhe sipas sondazheve që vetë i kemi bërë, që do të jemi në balotazh”, tha ai.
Baxhaku ka shtuar se nuk mund të thotë me saktësi se çfarë ka ndikuar në përkrahjen për LVV-në, duke kritikuar qeverisjen e deritanishme të Mytaher Haskukës në Prizren.
“Nuk mund të them saktë se çka ka ndikuar në këtë rezultat. Sigurisht ende ekziston fryma për VV-në, përndryshe sa i përket qeverisjes së Mytaher Haskukës, ajo ka qenë katastrofale, zhgënjyese dhe nuk ka pasur asnjë arsye me u votu i njëjti kandidat për kryetar në Prizren”, tha ai për KALLXO.com.
“Kryetari ynë ka qenë shumë më bindës shumë më i mirë edhe në paraqitjet publike, edhe në program ka qenë shumë më i mirë, por s’mund ta shpjegojmë ndryshe përveç që ende është një inercion, ndoshta një koalicion i heshtur me pakicat, sepse disa s’kanë pasur kandidat për kryetar e disa po”, shtoi nënkryetari i Degës së LDK-së në këtë komunë.
Duke folur për koalicionet e mundshme, ai tha se ende nuk kanë vendosur si kryesi për këtë çështje.
“Oferta për koalicione kemi pasur. Nuk kemi vendosur fare a do të shkojmë në koalicion me dikë. Oferta kemi pasur nga të dyja palët, por në mbledhje të kryesisë nuk kemi vendosur fare a do të hyjmë në koalicion apo jo, nuk kemi vendim të prerë”, përfundoi Baxhaku për KALLXO.com.
Sipas rezultateve preliminare të publikuara nga ueb faqja e Komisionit Qendror të Zgjedhjeve, deri më tani 21 komuna do të shkojnë në balotazh, ndërsa në 17 është përcaktuar fituesi më 17 tetor.
