I dërguari i posaçëm i Bashkimit Evropian për dialogun mes Kosovës dhe Serbisë, Mirosllav Lajçak dhe presidenti i Serbisë, Aleksandar Vuçiq. Foto: REL
Lajçak: Një diskutim i gjatë dhe i vështirë me Vuçiqin
Përfaqësuesi i Posaçëm i Bashkimit Evropian për dialogun ndërmjet Kosovës dhe Serbisë, Miroslav Lajçak, ka thënë se dje ka pasur një diskutim të gjatë dhe të vështirë, por të drejtë, me presidentin e Serbisë, Aleksandar Vuçiq.
“Unë mbështetem në sjelljen e përgjegjshme të të gjithëve për të treguar përmbajtje për sigurinë dhe stabilitetin. Dhuna duhet shmangur. U pajtuam që të gjitha marrëveshjet e Dialogut duhet të zbatohen” – thuhet në postimin e Lajçakut në Twitter.
Long and difficult, but fair discussion with @predsednikrs @avucic last night.
I count on the responsible behavior of all to show restraint for security and stability. Violence must to be avoided.
Agreed that all Dialogue agreements have to be upheld and fully implemented. pic.twitter.com/8wUnW7nR0t
— Miroslav Lajčák (@MiroslavLajcak) November 5, 2022
Vizita e Lajçakut në Beograd ka ardhur një ditë pas Samitit të Procesit të Berlinit që u mbajt më 3 nëntor.
Që nga 1 nëntori, autoritetet në Kosovë kanë thënë se qytetarëve që kanë automjete me targa ilegale do të marrin fletëqortime. Kjo është faza e parë e planit prej tri etapave që Qeveria e Kosovës ka thënë se do të zbatojë nga 1 nëntori deri më 21 prill të vitit 2023.
Faza e dytë parasheh gjobë në vlerë 150 eurosh për shoferët që kanë automjete me targa serbe, ndërkaq në fazën e tretë do të përdoren targa provuese. Pas 21 prillit, sipas Qeverisë, nuk do të lejohet qarkullimi i automjeteve që nuk kanë targa RKS.
Të zhgënjyer me vendimin e Qeverisë së Kosovës janë shprehur Shtetet e Bashkuara të Amerikës dhe Bashkimi Evropian.
Në deklaratën e lëshuar nga zëdhënësi i Departamentit Amerikan i Shtetit, Ned Price, thuhej se janë të zhgënjyer që Qeveria e Kosovë ka refuzuar kërkesat e partnerëve ndërkombëtarë.
“Shtetet e Bashkuara janë të zhgënjyera dhe të shqetësuara që qeveria e Kosovës ka refuzuar kërkesat për ta bërë këtë nga partnerët e saj ndërkombëtarë. Kosova dhe Serbia duhet të punojnë urgjentisht dhe në mënyrë fleksibël për të arritur një marrëveshje gjithëpërfshirëse për marrëdhëniet e normalizuara, me në qendër njohjen reciproke. Është e rëndësishme që të dyja palët të reduktojnë retorikën nxitëse dhe të ndërmarrin veprime konkrete për të demonstruar angazhimin e tyre për bashkëpunim konstruktiv për të siguruar një të ardhme të qëndrueshme dhe të begatë për rajonin” – thuhet në reagim.
Të zhgënjyer janë shprehur edhe Bashkimi Evropian. Sipas BE-së, Kosova mund t’i heq gradualisht tabelat KM, por duhet procesi të shkojë me dialog.
“Kosova ka të drejtë të heqë gradualisht tabelat KM, por procesi duhet të zhvillohet në mënyrën e dakorduar në Dialog dhe të zbatohet në mënyrë gjithëpërfshirëse dhe konsultative” – thuhet nga BE.
Sipas tyre, vendimi i Qeverisë së Kosovës nuk është në përputhje me marrëveshjet e dialogut.
“Derisa, vendimi është një hap në drejtimin e duhur, nuk është në përputhje me marrëveshjet e dialogut, të cilat janë të detyrueshme për të dyja palët” – thuhet më tej në reagimin e BE-së.
Sipas BE-së, marrëveshja e vitit 2016 parashikonte proces të renditur dhe të përcaktuar qartë me një afat kohor 12-mujor për procesin e largimit, i cili nuk është ndjekur.
Sot është paralajmëruar një takim mes Listës Serbe si dhe zyrtarëve serbë të cilët janë pjesë e institucioneve të Kosovës, për të marrë një vendim në lidhje me qëndrimin apo largimin e tyre nga institucionet.
Takimi u paralajmërua pas suspendimit nga detyra e drejtorit rajonal të Policisë së Kosovës në veri, Nenad Gjuriq. Suspendimi i tij u bë pas dyshimit se i njëjti refuzoi që ta zbatojë vendimin e Qeverisë së Kosovës për lëshimin e fletëqortimeve për pronarët e automjeteve me targa me akronime të qyteteve të Kosovës të lëshuara nga Serbia.
