Kuvendi i Kosovës/ Foto: KALLXO.com
Kuvendi miraton në parim Projektligjin për Prokurorinë Speciale
Me 69 vota pro, deputetët e Kuvendit të Kosovës kanë miratuar në parim Projektligjin për Prokurorinë Speciale.
Mbështetje këtij Projektligji i kanë dhënë të gjitha subjektet politike në Kuvend.
Ky Projektligj ka për qëllim të rregullojë mënyrën e funksionimit të Prokurorisë Speciale si një organ prokurorial i përhershëm dhe i specializuar që vepron në kuadër të Prokurorit të Shtetit, përgjegjëse dhe e autorizuar për hetimin dhe ndjekjen e veprave të caktuara penale.
Projektligji për Prokurorinë Speciale është miratuar në mbledhjen e Qeverisë në shtator të këtij viti.
Ministrja e Drejtësisë, Albulena Haxhiu, ka thënë se më këtë Projektligj synojnë avancimin e mëtejshëm të legjislacionit për Prokurorinë Speciale.
“Është rregulluar bashkëpunimi i Prokurorisë Speciale me institucionet e tjera, veçanërisht me Policinë e Kosovës” – tha ajo.
Haxhiu shtoi se kanë paraparë ekipe të përbashkëta të hetimit në raste më të ndjeshme dhe më të ndërlikuara nga ana e prokurorisë dhe policisë.