Kurti shpreh ngushëllime për vdekjen e ish-komandantit të KFOR-it
Kryeministri i Kosovës, Albin Kurti, nëpërmjet një telegrami ka shprehur ngushëllime për ndarjen nga jeta të ish-komandantit të Misionit të forcave paqeruajtëse të NATO-s në Kosovë, gjeneralit Klaus Reinhardt.
Kurti, vdekjen e gjeneralit Reinhardt e ka vlerësuar humbje jo vetëm për familjen, miqtë e bashkëpunëtorët e tij, por edhe për popullin e Kosovës.
“Roli dhe kontributi i gjeneralit Reinhardt në ruajtjen e paqes e sigurisë në vitin e parë të pasluftës në Kosovë është i pamohueshëm” ka thënë kryeministri.
Në telegramin drejtuar ambasadorit të Gjermanisë, Joern Rohde, kryeministri ka rikujtuar periudhën e vështirë të pasluftës, kur gjenerali udhëhoqi me përgjegjësinë më të lartë misionin më të madh ushtarak të NATO-s, prej 50 mijë trupash, sa ishin të vendosura atëherë në Kosovë.
Kryeministri ka thënë që gjenerali Reinhardt e kuptonte shumë mirë kontekstin historik e politik të Kosovës. Ai bashkëndjente me problemet e popullit që atë kohë përpiqej të rindërtonte jetën në shtëpitë e pronat e djegura e të shkatërruara nga forcat policore e ushtarake të Serbisë.
“Përveç ndihmës në rindërtimin e shtëpive e shkollave, gjenerali Reinhardt dha kontribut edhe në ndërtimin dhe konsolidimin e institucioneve qeverisëse të Kosovës”, ka theksuar kryeministri.
Misioni paqeruajtës i KFOR-it në Kosovë ka ulur në gjysmë shtizë flamurin si shenjë nderimi për jetën e Gjeneralit Klaus Reinhardt, i cili shërbeu në Kosovë si komandant i forcave të NATO-së.
KFOR përmes një postimi në Twitter ka thënë se ndajnë dhimbje për vdekjen e Reinhardt i cili vdiq dje në moshën 80 vjeçare.
“Me zemër të rëndë përshëndesim dhe ulim flamurin e KFOR-it në gjysmështizë për humbjen e ish-komandantit të tij, Gjeneral Dr. Klaus REINDHARDT. Nuk i harrojmë kurrë vëllezërit tanë dhe të gjithë ndajmë dhimbjen për humbjen e ish-komandantit tonë. U prefsh në paqe Gjeneral”, thuhet në njoftimin e KFOR-it.
Telegram ngushëllimi i kryeministrit Kurti:
I nderuar ambasador,
Me pikëllim të thellë mora lajmin për ndarjen nga jeta të ish-komandantit të KFOR-it, gjeneralit Klaus Reinhardt.
Vdekja e tij është humbje jo vetëm për familjen, miqtë e bashkëpunëtorët e tij, por edhe për popullin tonë, sepse gjenerali Reinhardt ishte afër nesh dhe na ndihmoi shumë në vitet e para dhe të rënda të pasluftës.
Roli dhe kontributi i gjeneralit Reinhardt në ruajtjen e paqes e sigurisë në vitet 1999-2001 është i pamohueshëm.
Gjenerali Reinhardt udhëhoqi me përgjegjësinë më të lartë misionin më të madh ushtarak të NATO-s prej 50 mijë trupash sa ishin të vendosura atëherë në Kosovë.
Edhe pse ushtarak, gjenerali Reinhardt e kuptonte shumë mirë kontekstin historik e politik të Kosovës.
Ai bashkëndjente me problemet e popullit që atëkohë përpiqej të rindërtonte jetën në shtëpitë e pronat e djegura dhe të shkatërruara nga forcat policore e ushtarake të Serbisë.
Përveç ndihmës në rindërtimin e shtëpive e shkollave, gjenerali Reinhardt dha kontribut edhe në ndërtimin dhe konsolidimin e institucioneve qeverisëse të Kosovës.
Ju shpreh ngushëllimet më të sinqerta familjes dhe miqve të z. Reinhardt, ushtrisë gjermane dhe forcave paqeruajtëse të NATO-s në Kosovë.
Populli dhe shteti i Kosovës do t’i kujtojë përherë me respekt e mirënjohje angazhimin, kontributin dhe humanizmin e gjeneralit Reinhardt.