Foto: Urim Krasniqi/KALLXO.com

Kurti: Pushimi 12 muajsh i lehonisë do të ndahet në mes të dy prindërve

Lideri i Lëvizjes Vetëvendosje, Albin Kurti ka shpalosur në Debatpernime programin qeverisës për zgjedhjet e parakohshme që do të mbahen më 14 shkurt.

Kurti në mes të shumë premtimeve ka thënë se pushimi i lehonisë do të jetë 12 muajsh dhe do të ndahet në mes të dy prindërve.

“Duhet ta ndajnë të dy prindërit pushimin e lehonisë (12 muajsh) dhe shteti do ta ndajë barrën bashkë me ndërmarrjet përkatëse. Ne ende nuk kemi vendosur pagesën sepse na duhet një dialog me sindikatat dhe ndërmarrjet”, tha Kurti në DebatPernime.

Albin Kurti së bashku me ekipin e tij, Glauk Konjufca, Arben Vitia, Hekuran Murati, Albulena Haxhiu, Arbërie Nagavci, Fitore Pacolli, Jeta Statovci, Mimoza Kusari, Rozeta Hajdari nga Lëvizja Vetëvendosje, sonte janë të ftuar në #DebatPernime.

Cila është oferta e Lëvizjes Vetëvendosje në zgjedhjet e 14 shkurtit?

Cilat janë planet e Albin Kurtit dhe ekipit që ai i udhëheq për luftimin e korrupsionit?

A do të jetë kryeministër ai pas zgjedhjeve të 14 shkurtit?

Siç dihet, Kurti nuk është certifikuar në listën e Vetëvendosjes nga ana e KQZ-së, pas vendimit të Gjykatës Supreme të Kosovës ai mbeti përfundimisht jashtë listës së votuesve.

Mirëpo, Lëvizja Vetëvendosje nuk ka dorëzuar KQZ-së, listë të re edhe pas vendimit të Supremes, duke e lënë kështu listën e njëjtë.

Cikli i #DebatPernime i moderuar nga Jeta Xharra do të mbahet gjatë dhjetë ditëve të fushatës zgjedhore për zgjedhjet e jashtëzakonshme parlamentare në Kosovë, të cilat do të mbahen të dielën, me 14 shkurt.

Përballë Jeta Xharrës do të jenë kandidatët për deputetë nga partitë dhe koalicionet kryesore që garojnë në zgjedhjet e jashtëzakonshme të 14 shkurtit.

Debati transmetohet në orën 20:20 në RTV Dukagjini dhe drejtpërdrejt në Facebook të KALLXO.com.