Kurti njofton për hapjen e tenderit për ndërtimin e objekteve për banim të përballueshëm në katër komuna

Kryeministri i Kosovës, Albin Kurti ka njoftuar se e kanë hapur tenderin për ndërtimin e objekteve për banim të përballueshëm në disa komuna.

Tenderi për ndërtimin e objekteve për banim të përballueshëm kap vlerën mbi 38 milionë euro, ndërsa do të zbatohet në këto komuna: Pejë, Gjilan, Podujevë e Istog.

Hapja e tenderit për ndërtimin e objekteve për banim të përballueshëm vjen pas aplikimit për identifikimin e lokacioneve për objektet e banimit të përballueshëm në Kosovë, i cili u hap në muajin shkurt të këtij viti.

“Ta bësh Kosovën të jetueshme do të thotë ta bësh Kosovën të banueshme. Këtë e bën projekti ynë i Banimit të Përballueshëm, që siç e kemi premtuar edhe do ta realizojmë” – ka shkruar kryeministri Kurti në Facebook.

Sipas Kurtit, nga fillimi i mandatit të tyre në Qeverinë e Kosovës kanë punuar për ta realizuar banimin e përballueshëm, të cilin e kishin premtuar.

“Në prill të vitit 2021 formuam komitetin këshillues për studimin e fizibilitetit; Në shkurt 2022 kemi pranuar studimin e fizibilitetit ku theksoheshin rrugët që duhet ndjekur, çështja e pronave dhe sfidat që parasheh ky projekt; Në shkurt të vitit 2024 hapëm thirrjen për të gjitha komunat që të aplikojnë për banim të përballueshëm; Në korrik 2024 miratuam në Qeveri projektligjin për këtë projekt; dhe Sot, 29 nëntor 2024 po e hapim tenderin për ndërtimin e objekteve për banim të përballueshëm” – ka përmendur Kurti.

Kurti ka paralajmëruar se ndërtimin e banimit të përballueshëm shumë shpejt do ta procedojnë edhe me nëntë komuna tjera që janë në procedurë, të cilat nuk i ka bërë të ditura.

“Do të sigurojmë banim për të gjithë. Banim të dinjitetshëm, jo vetëm strehim” – ka përfunduar Kurti.

Ministri i Mjedisit, Planifikimit Hapësinor dhe Infrastrukturës, Liburn Aliu, kishte njoftuar se është hapur aplikimi për identifikimin e lokacioneve për objektet e banimit të përballueshëm në Kosovë.

Më 09.02.2024 ai u kishte bërë thirrje komunave që të aplikojnë në këtë thirrje, në mënyrë që të identifikohen lokacionet e duhura për këtë projekt.

Ndërkohë, më 16.02.2024, Aliu i kishte bërë të ditura kriteret për përcaktimin e lokacioneve për ndërtimin e objekteve të banimit të përballueshëm, si dhe dokumentet e nevojshme për aplikim.

Në anën tjetër, një marrëveshje në vlerë 25 milionë euro ishte nënshkruar më 25.01.2024 nga ministri i Financave, Punës dhe Transfereve, Hekuran Murati dhe guvernatori i Bankës për Zhvillim të Këshillit të Europës (CEB), Carlo Monticelli, sa i përket banimit të përballueshëm për familjet e cenueshme, të cilat kanë të ardhura të ulëta pa zgjidhje banimi.

Ndërsa, në miratimin e programit qeverisës për vitet 2021-2025, kryeministri Albin Kurti kishte premtuar se do të mundësojnë banim të përballueshëm social për 4,000 familje me skemat 120×120 dhe 150×150.