Kurti i përgjigjet ambasadorit amerikan rreth formimit të Asociacionit

Kryeministri i Kosovës, Albin Kurti ka deklaruar se nuk mund të ketë Asociacion mbi baza etnike.

Këtë deklaratë Kurti e ka dhënë sot, duke iu përgjigjur ambasadorit të SHBA-së në Kosovë, Philip Kosnett, i cili të mërkurën ka thënë që Kosova e ka detyrim ta formojë Asociacionin e komunave me shumicë serbe.

Kurse, Kurti ka thënë se mund të ketë Asocaicon të komunave mbi baza zhvillimore.

“Nuk mendoj që është e mundshme në rendin juridik dhe kushtetues të Republikës së Kosovës të ketë Asociacionin mbi baza etnike. Mund të ketë Asociacion të komunave mbi baza zhvillimore, mund të ketë mbi baza gjeografike, ta zëmë Asociacion të komunave të bjeshkëve të Rugovës, të maleve të Sharrit ose të lumit Lepenc, por Asociacion mbi bazë etnike nuk mund të kalojë sa i përket as frymës dhe as germës së Kushtetutës së Republikës së Kosovës dhe praktiktikisht një gjë të tillë e ka thënë edhe aktgjykimi i Gjykatës Kushtetuese, i publikuar më 23 dhjetor të vitit 2015”, tha ai.

“Kërkesa për Asociacion, e cila ka tash e gati një dekadë që mbahet aktuale, nuk më duket që vije nga njerëzit e thjeshtë por nga politikanët e fqinjët tonë verior”, shtoi kryeministri.

Asociacioni i komunave me shumicë serbe në Kosovë është njëra prej marrëveshjeve më të diskutueshme në kuadër të dialogut Kosovë-Serbi, për të cilën ishin pajtuar palët në kuadër të procesit, por që nuk është zbatuar, pasi u vlerësua se disa pika të saj janë në kundërshtim me Kushtetutën e Repubikës së Kosovës.

Lëmshi rreth Asociacionit, të dhënat e raportit të BIRN-it “Big Deal”