Kurti i gatshëm për takim me LDK-në: Marrëveshjen na e kërkojnë qytetarët

Ka tre muaj që dy partitë më të votuara në vend, Lëvizja Vetëvendosje dhe Lidhja Demokratike e Kosovës, janë në negociata për një marrëveshje për të qeverisur së bashku, por nuk kanë arritur ende të vijnë në një ujdi.

Ndërkohë po bëhen gati dy javë që nga takimi i fundit kur liderët e këtyre dy partive, Albin Kurti e Isa Mustafa, për marrëveshjen për bashkëqeverisje.

“Nuk ka takime tash e 8 ditë, ndërkohë unë jam në Kosovë dhe jam i gatshëm i interesuar. Më 9 janar na është thënë së që do të mblidhet këshilli i përgjithshëm për propozimin tonë”, tha sonte Albin Kurti.

Kurti, kandidati më i votuar në zgjedhjet e 6 tetorit, i bëri thirrje LDK që të ulen prapë dhe të bisedojnë për marrëveshje.

“Takimi i fundit është mbajtur më 9 janar dhe kjo është për të ardhur keq, mendoj se ne duhet të kthehemi në tavolinën e bisedimeve për të arritur marrëveshje dhe kjo është thirrja ime”, shtoi ai.

Kurti tutje thotë se në takimin e fundit kur LVV ka dhënë propozime LDK ka thënë se duhet të kthehen në Këshillin e Përgjithshëm të partisë për të diskutuar.

“Në takimin e fundit në propozimin tonë na është thënë që do të kthehen në Këshillin e Përgjithshëm të LDK për ta marrë mendimin. Nuk jam në dijeni nëse ka diçka të re në këtë aspekt, mirëpo është e domosdoshme që të arrijmë marrëveshje dhe qeverisje bashkë, këtë na e kërkojnë qytetarët përditë dhe këtë e ka kërkuar edhe vullnet i tyre më 6 tetor të vitit të kaluar dhe besoj që me përgjegjësi politike dhe duhet të ulemi dhe të merremi vesh”, vazhdoi tutje Kurti.

Ai gjithashtu tha se do i kthejë përgjigje Presidentit Thaçi, kur të bëjë marrëveshjen me LDK-në.

“Ne do t’i kthejmë përgjigje Presidentit, do t’ia dërgojmë tonën, por po përpiqemi maksimalisht kjo të ndodhë pas marrëveshjes që do të arrijmë me LDK. Pra nga takimi me 9 janar të hënën bëhen dy javë dhe jemi përpjekur dhe po përpiqemi që një propozim tillë shkojë në bazë të një marrëvesheje me LDK”, tha ai.

Do NOT follow this link or you will be banned from the site!