Kurti do të marrë pjesë në një Konferencë në Sarajevë për raportet rajonale

Kryeministri i Kosovës, Albin Kurti, do të udhëtojë më 5 dhjetor në Sarajevë, ku një ditë më vonë, do të marrë pjesë në një Konferencë të organizatës joqeveritare “Asociacioni i Intelektualëve të Pavarur Krug 99”.

Lajmi u konfirmua për Radio Evropa e Lirë, nga udhëheqësi i kësaj organizate, Adil Kullenoviq, i cili shtoi se Kryeministri kosovar do të mbajë një fjalim në këtë Konferencë.

“Në këtë sesion do të diskutohet për marrëdhëniet rajonale.” – tha Kullenoviq për REL-in.

Vizita e Kurtit në Sarajevë do të komplikojë ndjeshëm marrëdhëniet në Bosnjë e Hercegovinë – deklaroi Presidenti i Republikës Sërpska, Millorad Dodik.

“Ne nuk do të lejojmë që shqiptarëve nga ai rajon t’u lejohet hyrja me letërnjoftim, sepse kjo do të nënkuptonte njëfarë njohjeje të të ashtuquajturës Kosovë. Në këtë drejtim, kemi lajmin se Kurti po vjen në Sarajevë. Dhe, kur ndërhymë e thamë se kjo do të ishte një shkëndijë për probleme serioze mes nesh në Bosnjë e Hercegovinë, ata menduan që ta ftonte ndonjë organizatë joqeveritare në ndonjë sesion.” – tha Dodik, raporton RTRS.

Në tetor, Kurti kishte deklaruar gjatë një Samiti të Procesit të Berlinit, se Kosova do të lejojë qytetarët e Bosnjës e Hercegovinës të hyjnë në Kosovë me letërnjoftim – duke nisur nga 1 janari 2025.

Marrëveshja për heqjen e regjimit të vizave mes Kosovës dhe Bosnjë e Hercegovinës, që do të mundësojë që qytetarët e këtyre dy vendeve të udhëtojnë pa viza, ende nuk është ratifikuar në Parlamentin e Bosnjës.

Ajo po bllokohet nga përfaqësuesit e entitetit të Republikës Sërpska, të udhëhequr nga Lidhja e Socialdemokratëve të Pavarur e Millorad Dodikut.

Qytetarët e Kosovës, që duan të udhëtojnë drejt Bosnjës, do të duhen të pajisen me viza, “që lëshohen vetëm në raste të jashtëzakonshme”; si dhe, duhet të miratohen nga Ministria e Punëve të Jashtme e Bosnjë e Hercegovinës. Kërkesat për viza mund të dorëzohen në Shkup, Podgoricë dhe Beograd. Ndërkaq, pagesa për vizë është 31 euro.

Për qytetarët e Bosnjë e Hercegovinës që duan të udhëtojnë në Kosovë kërkohet, ndër të tjera, një letër garancie ose rezervim hoteli, kontratë pune dhe certifikatë apo konfirmim se nuk janë të dënuar. Viza kushton 40 euro dhe dorëzohet në ambasadën e Kosovës në Zagreb.

Bosnja e Hercegovina dhe Kosova nuk e njohin njëra-tjetrën, për shkak të kundërshtimit të entitetit të Republikës Sërpska – të udhëhequr nga presidenti prorus Millorad Dodik – i cili është nën sanksione amerikane për minimin e Marrëveshjes së Dejtonit./REL.