Kurti: Dhuna brutale erdhi nga ekstremistët e dirigjuar nga Beogradi

Kryeministri Albin Kurti gjatë qëndrimit në komunën e Dragashit, duke lavdëruar bashkëjetesën etnike atje, është pyetur nga gazetarët edhe për akuzat që erdhën nga Beogradi në drejtim të tij, pasi ai në seancën e djeshme të Kuvendit të Kosovës përmendi emrat e përveçëm të serbëve, të cilët qëndrojnë prapa dhunës së shfaqur në protestat në tri komunat veriore.

“Sa i përket atyre emrave që i kam përmendur në seancën plenare të Kuvendit të Republikës, i kam përmendur 5 që janë arrestuar dhe organet tona të sigurisë i kanë identifikuar edhe 28 të tjerë, të cilët kanë marrë pjesë në organizim, orkestrim e nganjëherë edhe aktivisht në sulme të dhunshme kundër ushtarëve të NATO-s, kundër policëve të Kosovës dhe kundër juve gazetarëve, siç mund ta keni parë edhe vet. Pra, është sundimi i ligjit, janë proceset e drejtësisë ato të cilat do ta vërtetojnë gjithçka. Mirëpo ne videot, fotografitë i kemi pa që të gjithë. Nuk jetojmë në shekullin e XIX, që mos të dihet çka ka ndodh në një vend tjetër. Në kohë reale është përcjellë një dhunë brutale e elementeve ekstremistë të cilët edhe dirigjohen, edhe paguhen nga Beogradi zyrtar”, ka theksuar Kurti.

Ai tutje ka folur edhe për Listën Serbe. “Lista Serbe kur i ka braktisur institucionet me datën 5 nëntor të vitit të kaluar e ka bërë gabimin kardinal. Pastaj e kanë pasur gabimin e dytë që i kanë bojkotuar zgjedhjet, pastaj kanë thirrur të tjerët për bojkot të zgjedhjeve dhe për këto gabime të njëpasnjëshme që janë pasojë e qëllimeve të gabuara duhet të paguajnë ata, jo Republika jonë”, ka shtuar kryeministri./ RTK