Kryetarët e Anamoravës vendosin për orën policore

Kryetarët e regjionit të Anamoravës, në takimin e mbajtur nën kryesimin e kryetarit të Gjilanit, Lutfi Haziri dhe në koordinim me të gjitha institucionet lokale dhe regjionale, kanë marrë vendim që të vazhdohen masat e kufizimit të lirisë së lëvizjes si preventivë kundër Covid-19.

Nga sot, qytetarët e komunave: Gjilan, Kamenicë, Novobërdë dhe Viti mund të lëvizin nga ora 06:00 deri në 17:00, ndërkaq kufizohet lëvizja e tyre nga ora 17:00 deri në ora 06:00.

Sipas komunikatës së dërguar nga zyra për informim, kryetari i Komunës së Gjilanit, Lufti Haziri ka thënë se takimi i ditës së djeshme është në funksion të masave të reja krahas rekomandimeve të Institutit Kombëtar të Shëndetit Publik për kujdes maksimal si dhe Ministrisë së Shëndetësisë që të bëhet një mobilizim edhe më i madh në parandalim të Covid-19

“Njëzëri jemi të gjithë së bashku. Vendosmëri e përbashkët është që masat e parandalimit të jenë edhe më strikte. Është në pyetje jeta e qytetarëve tanë dhe për këtë kërkohet veprim shtetëror, në këtë rast bashkëpunim i mirëfillt regjional. Masat do të jenë në funksion të ruajtjes së shëndetit public dhe për cdo ndryshim, do t’ju njoftojmë me kohë”, citohet të ketë thënë Haziri.

Në Gjilan numri total i të prekurve me COVID-19 është 21, kurse në nivel vendi janë 362. Prej tyre 59 janë shëruar dhe 8 viktima.