Albin Kurti - Foto: ZKM

Kryeministri Kurti uron besimtarët për muajin e shenjtë të Ramazanit

Kryeministri i Kosovës, Albin Kurti, ka uruar besimtarët e fesë islame me rastin e fillimit të muajit të Ramazanit.

Kurti tha se ky muaj i shenjtë për besimtarët është shembull i sundimit të mendjes mbi trupin.

“Është muaji kur stomaku i zbrazët, nga lindja deri në perëndimin e diellit, shoqërohet me shpirtin e ushqyer nga mirësia e mirësjellja, veprat e fjalët e mira, dashuria e paqja me njëri-tjetrin”, tha ai.

Kreu i ekzekutivit shtoi se edhe këtë vit muaji i Ramazanit “na gjen në rrethana të rënduara të pandemisë”, duke u bërë thirrje qytetarëve për kujdes.

“ Dashurinë dhe solidaritetin me tjetrin gjatë këtij muaji të bekuar, do të mund ta shprehim më së miri duke marrë përgjegjësi për ruajtjen e shëndetit tonë dhe të më të dashurve tanë nga virusi i rrezikshëm. Ju bëftë mirë syfyri i parë, e ju qoftë i lehtë agjërimi”, shkroi Kurti.

Urimi i plotë i kryeministrit, Albin Kurti:

Sonte fillon Ramazani, muaji më i veçantë i fesë islame. Për katërmbëdhjetë shekuj, myslimanët në të gjithë botën e kremtojnë këtë muaj, duke e përmbajtur veten nga ushqimet e të mirat e përditshme, me motivin e lartë të sakrificës dhe bashkëndjenjës me të dobtin, të varfërin dhe të sëmurin.

Agjërimi për besimtarin është sfidë fizike dhe psikike. Është shembulli i sundimit të mendjes mbi trupin. Është muaji kur stomaku i zbrazët, nga lindja deri në perëndimin e diellit, shoqërohet me shpirtin e ushqyer nga mirësia e mirësjellja, veprat e fjalët e mira, dashuria e paqja me njëri-tjetrin.

Edhe sivjet Ramazani na gjen në rrethana të rënduara të pandemisë, që vazhdon të marr jetë njerëzish anembanë globit.

Dashurinë dhe solidaritetin me tjetrin gjatë këtij muaji të bekuar, do të mund ta shprehim më së miri duke marrë përgjegjësi për ruajtjen e shëndetit tonë dhe të më të dashurve tanë nga virusi i rrezikshëm.

Ju bëftë mirë syfyri i parë, e ju qoftë i lehtë agjërimi.