Kryeministri Kurti në Çikatovë: Është koha e fundit të sjellim drejtësi për viktimat e dënim për kriminelët

Në 24- vjetorin e masakrës në fshatin Çikatovë e Vjetër të Drenasit, kryeministri Albin Kurti, bashkë me presidenten, Vjosa Osmani Sadriu, dhe kryetarin e Kuvendit, Glauk Konjufca, bënë homazhe dhe vendosë lule te memoriali i ngritur në nderim të të vrarëve.

Në një komunikatë për media të Zyrës së Kryministrit bëhet e ditur se duke folur për masakrën e 17 prillit të vitit 1999, kryeministri Kurti tha se në Çikatovë të Vjetër të Drenicës, jo vetëm që u vranë shqiptarët që jetonin në tokën e tyre dhe dëshironin veçse liri dhe paqe, por gjithashtu edhe kufomat e tyre u rrëmbyen dhe u dërguan në Serbi në varreza masive, në pesë varreza masive gjithsej mbi 950 shqiptarë.

“Ata që u vranë këtu në Çikatovë të Vjetër u zbuluan si kufoma në Rudnicë të Rashkës. Pra në Rashkë atje ku krerët shtetërorë të Serbisë i mbajnë mbledhjet me përfaqësues politikë të listës serbe, me eksponentë të krimit të organizuar dhe me drejtues të strukturave paralele në Kosovë, kjo ndodhë pra në Rashkë të Serbisë. E në Rudnicë të Rashkës është një varrezë masive prej të cilës janë ekshumuar edhe shqiptarët e vrarë në Çikatovë të Vjetër nga forcat serbe para 24 vjetëve”- tha kryeministri.

Tutje, në komunikatë thuhet se kryeministri potencoi se më datë 30 maj bëhen 4 vjet prej se në Kuvendin e Republikës është amendamentuar Kodi i Procedurës Penale dhe është mundësuar që kriminelët serbë të gjykohen edhe në mungesë për krimet që i kanë kryer gjatë luftës.

“Andaj, ne këtu si tre krerë të institucioneve shtetërore që jemi bëjmë thirrje edhe njëherë që Prokuroria e Shtetit, sistemi i drejtësisë në vendin tonë të jetë shumë më aktiv sepse është koha e fundit të sjellin drejtësi për viktimat e dënim për kriminelët. Nuk mund të presim që faktorët ndërkombëtarë do ta bëjnë punën tonë, nëse ne nuk e bëjmë së pari një gjë të tillë vet. Kosova është shtëpia jonë dhe ne e kemi për obligim shtetëror, kombëtar e qytetar, që të sjellim drejtësi për ata që derdhën gjakun për lirinë tonë të cilën e gëzojmë të gjithë ne sot”- shtoi tutje Kurti.

Tre krerët institucionalë sot morën pjesë edhe në përkujtimin e masakrës në Poklek të Drenasit.

24 vjet nga masakra në dy fshatrat e Drenicës, Poklek dhe Çikatovë e vjetër