Krejt çka dihet për vrasjen e shumëfishtë që tronditi Gjilanin

Gjilani është tronditur nga një vrasje e shumëfishtë që ka ndodhur sot rreth orës 13:00 në një shtëpi në rrugën “Xhevat Ajvazi” në lagjen ‘Bujanina’ në këtë qytet.

Sipas Prokurorisë së Gjilanit, një zyrtare policore ka vrarë 4 anëtarë të familjes së saj: prindërit, dy vëllezërit dhe pastaj ka kryer vetëvrasje.

Prokuroria nuk ka njoftuar deri më tani për ndonjë motiv të mundshëm për vrasjen.

Ekipi i KALLXO.com është duke qëndruar në vendin e ngjarjes, përkatësisht te vendbanimi i të ndjerëve.

Fqinjët familjen e viktimave e kanë përshkruar si të qetë dhe pa probleme.

Në vendin e ngjarjes menjëherë kanë dalë Policia, prokurori i rastit dhe ekipi mjekësor, të cilët edhe kanë konstatuar vdekjen e tyre, ndërsa me urdhër të prokurorit trupat e të njëjtëve do të dërgohen për obduksion, në Institutin e Mjekësisë Ligjore, në Prishtinë.

Drejtori i Policisë arrin në Gjilan pas vrasjes së shumëfishtë

Ndërkaq, rreth orës 16:00 kryetari i Komunës së Gjilanit, Lutfi Haziri ka dalë në vendin ku ndodhi rasti tragjik.

Ai përmes një konferencë për media tha se familja tashmë e ndjerë – Bllaca ishte familje e ndershme dhe e respektuar.

“I gjithë Gjilani është në ditë zie. Tragjedia që po kalojmë është nën hetime dhe duke u zbardhur nga ana e organeve të shtetit. Është shuar një familje, është tragjedia më e madhe që mund ti ndodhë çdo kujt dhe për ne sepse kanë qenë një familje e ndershme, janë familje jashtëzakonisht e respektume por që problemet që kanë pas në këtë rast ka shkaktuar këtë tragjedi e cila mund të përballet vetëm me solidaritet”, tha kryetari Haziri.

Haziri nga vendi ku ndodhi vrasja e shumëfishtë: Familja Bllaca ishte familje e respektuar

Po ashtu, ai tha se do të propozojë një ditë zie për këtë rast tragjik.

“Komuna do të jetë pranë familjes së mbetur, pra me mixhën si autoriteti me i madh në familje bashkë me kryetarin e Bashkësisë Islame dhe komunitetin e Cërnicës ne do të koordinojmë krejt aktivitetet tradicionalisht. Kam propozuar një ditë zie për nder të familjes Bllaca që është ndarë nga jeta, kjo do të lidhet me ditën e varrimit, varet edhe më organet e tjera se kur të jenë të gatshëm edhe këshilli bashkësia islame”, tha Haziri.

“Djemtë [vëllezërit] kanë qenë edhe veprimtarë edhe të angazhum. Unë i njoh shumë mirë. Vetëm prokuroria e jep versioni zyrtar”, shtoi ai.

Në anën tjetër, gjatë ditës ka reaguar edhe kryetarja e Kuvendit të Kosovës, Vjosa Osmani, përmes një postimi në ‘Facebook’.

Ajo ka thënë se organet kompetente duhet të marrin masa urgjente për të shmangur rastet si ky.

“Thellësisht e prekur nga ngjarja tragjike në Gjilan. Mendimet dhe lutjet e të gjithë neve që u trishtuan nga kjo tragjedi do të jenë me viktimat dhe familjen e tyre në këtë orë të ligë”, ka shkruar kryeparlamentarja.

Ekipi i KALLXO.com do të iu mbajë të informuar në vazhdimësi për të detaje të tjera lidhur me këtë rast.

LIVE nga vendi ku ndodhi vrasja e shumëfishtë në Gjilan

Publiée par Kallxo.com sur Mardi 18 février 2020

(VIDEO) Vendi ku u vranë pesë persona në Gjilan

Gjilan, fotografi nga vendi ku u vranë pesë persona