Foto: PDK

Krasniqi në Skenderaj: E pakuptimtë që Qeveria të privojë Drenicën nga uji i pijes

Kryetari i Partisë Demokratike të Kosovës (PDK), Memli Krasniqi ka vizituar sot Komunën e Skenderajt në kuadër të vizitave nëpër komunat e Kosovës.

Sipas një komunikate të kësaj partie, kryetari i PDK-së, pas takimit me kryetarin e Skenderajt Fadil Nura, së bashku me ekipin e komunës kanë vizituar nga afër disa prej projekteve që po i kryen kryetari Nura nga buxheti vetanak i komunës.

Ata vizituan projektin e izolimit dhe fasadimit të banesave kolektive në qendër të qytetit, më pas projektin e parkingjeve në qytet, punimet në parkun qendror dhe projekte tjera që komuna po i kryen nga buxheti vetanak.

Kryetari i PDK-së, Memli Krasniqi uthuhet se u shpreh i kënaqur që qeverisja e re në Skenderaj që udhëhiqet nga PDK “po jetësohet duke i realizuar zotimet e bëra në fushatën zgjedhore para qytetarëve të kësaj komune”, ndonëse sipas tyre, Qeveria e Kosovës po i bllokon projektet e komunave.

“Më gëzon fakti që këtu ka një vullnet dhe një entuziazëm, një përkushtim të madh në punë, por që nuk ka një mbështetje që do të duhej ta kishin nga niveli qendror, e që është e pakuptimtë dhe e paarsyeshme, sepse zgjedhjet kanë përfunduar. Sot kryetari Nura është kryetar i të gjithë qytetarëve të Skenderajt, pa dallime partiake, andaj është obligim i qeverisë që t’i trajtojë qytetarët pa dallime”, tha ai.

Krasniqi kritikoi Qeverinë Kurti për neglizhencë të kërkesave të komunave që udhëhiqen nga partitë opozitare në nivel qendror.

“E vërteta është që shumicën dërrmuese të komunave në Kosovë, i udhëheqin partitë opozitare, por kjo s’duhet të jetë pengesë për qeverinë dhe për kryeministrin Kurti që t’i mbështesë këto komuna, derisa kemi raste ta zëmë që qeveria merr vendime për t’i obliguar kafiteritë që t’iu çojnë ujë nga çeshmja atyre që porosisin kafe, qytetarët e Drenicës, të Skenderajt në veçanti i penalizon duke ua pamundësuar shërbimin e ujit të pijes edhe për nevojat më bazike”, theksoi lideri i PDK-së.

Kurse, kryetari i Komunës së Skenderajt, Fadil Nura tha se qeveria aktuale e ka hequr komplet nga buxheti i këtij viti projektin kryesor që do të mundësonte furnizimin me ujë të pijes për qytetarët e kësaj komune.

“Një nga problemet më të mprehta në Komunën e Skenderajt është uji i pijes, një projekt madhor, i cili ka qenë në procedura të prokurimit, përkatësisht në organin e OSHP-së, fatkeqësisht nga qeveria e sotme është anuluar. Është hequr nga buxheti i planifikuar dhe kjo ka bërë që sot Skenderaj dhe 53 fshatra të ngelin kryesisht pa furnizim me ujë të pijes, gjë që është me të vërtetë për keqardhje”, tha Nura.

Ai shtoi se të gjitha projektet që po realizohen aktualisht në Komunën e Skenderajt janë me buxhet vetanak të komunës dhe përmes donacioneve.

Për kritikat e PDK-ssë, KALLXO.com po pret përgjigje nga Qeveria e Kosovës.