Philip Kosnett - Ambasador i ShBA-së në Kosovë

Kosnett: Marrëveshja e Uashingtonit mbetet në fuqi

Ambasadori i SHBA-së në Kosovë, Philip Kosnett, ka folur për marrëveshjen e Uashingtonit ndërmjet Kosovës dhe Serbisë për normalizim ekonomik.

Ai në një intervistë për RTK konsideron se marrëveshja e 4 shtatorit mbetet në fuqi derisa të ketë ndonjë ndryshim të mundshëm në të ardhmen.

“Javën e kaluar, gjatë seancës dëgjimore për konfirmim para Senatit të SHBA-së, Tony Blinken, i cili është i zgjedhuri i presidentit Biden për postin e sekretarit të Shtetit, tha se ai duartrokit punën që është bërë nga administrata e Trumpit për Kosovën dhe Serbinë. Kjo është në kontekst të përgjigjes së pyetjes që të gjithë po e bëjnë ‘a është marrëveshja e Uashingtonit ende në fuqi? A synon administrata e Bidenit që të vazhdojë punën e bërë nga administrata paraprake?’ dhe përgjigjja në thelb për këto dy pyetje është po, ne e konsiderojmë marrëveshjen e Uashingtonit në fuqi derisa të ketë ndonjë ndryshim të mundshëm që mund të bëhet në të ardhmen dhe pres që do të vazhdojmë të punojmë mbi punën e bërë më herët”, është shprehur diplomati amerikan.

Kurse në një shkrim të publikuar në faqen e Ambasadës Amerikane, Kosnett ka thënë se duhet të respektohet vendimi për pronën e Manastirit të Deçanit./RTK