Konjufca pranon urimet nga shefja e BE-së në Kosovë

Kryetari i Kuvendit të Kosovës, Glauk Konjufca, ka pritur në takim shefen e Zyrës së bashkimit Evropian në Kosovë, Nataliya Apostolova.

Shefja e misionit të BE-së ka uruar Konjufën për pozitën në krye të Parlamentit.

“Kryetari i Kuvendit të Republikës së Kosovës, Glauk Konjufca, takoi sot shefen e Zyrës së Bashkimit Evropian në Kosovë – Përfaqësuesen e Posaçme të BE-së, Nataliya Apostolova, me të cilën diskutoi për zhvillimet aktuale politike në vend, procesin e ndërtimit të institucioneve të reja, për agjendën evropiane të Kosovës dhe obligimet e Kosovës në këtë proces”, thuhet në njoftimin e Kuvendit të Kosovës.

“Shefja e misionit të BE-së uroi kryeparlamentarin Konjufca për përgjegjësinë e re instutucionale. Ajo theksoi se Bashkimi Evropian mbetet i përkushtuar për të ndihmuar rrugën evropiane të Kosovës, në të gjitha proceset dhe hapat e saj”, thuhet tuje në njoftim.

Në këtë takim u diskutua edhe për situatën politike në vend dhe bashkëpunimin ndërinstitucional.

“Kryeparlamentari Konjufca, nga ana e tij, theksoi përkushtimin e Kuvendit për të vazhduar dhe forcuar më tej bashkëpunimin me Zyrën e Bashkimit Evropian në Kosovë dhe se Kosova do të vazhdojë angazhimet e saj për përmbushjen e të gjitha kritereve që ajo ka para vetes në procesin euro-integrues”, thuhet në fund të komunikatës për media.