Konjufca e ndërpren seancën – Nuk ka kushte për të vazhduar
Kryetari i Kuvendit të Kosovës, Glauk Konjufca ka ndërprerë punimet e seancës së Kuvendit, pasi sipas tij nuk ka kushte për të vazhduar më tutje.
Konjufca ka thënë se një pjesë e opozitës po insiston që seanca të bllokohet dhe për këtë arsye siç tha ai, do të vazhdojnë javën e ardhshme.
“Seanca e sotme shkoi si shkoi, me këtë bllokim që mua mu duk krejt i paarsyeshëm, meqenëse nuk mendoj se ka pasë lidhje kjo seancë me temën për të cilën sot edhe u protestua por edhe është bllokuar seanca. Për shkak se nuk shoh edhe kushte të vazhdojmë sepse një pjesë e opozitës po insiston që kjo seancë të bllokohet, e vazhdojmë javën e ardhshme kur do që e shohim që kemi mundësi”, ka deklaruar Konjufca.
Kryeparlamentari ka paralajmëruar deputetët që seancat e Kuvendit nuk do të mund të bllokohen për shkak të betejave të tyre politike.
“Po ju paralajmëroj që seancat e Kuvendit nuk do të mund të bllokohen pafundësisht apo për shkak të betejave tona politike që i kemi. Megjithatë principi i shtetit është funksionimi i tij, funksionimi i demokracisë dhe në kuadër të saj funksionimi i Parlamentit është çelësi i saj themelor”, u shpreh Konujfca.
Deputetët e Partisë Demokratike të Kosovës në pjesën e dytë të seancës kanë bllokuar foltoren e Kuvendit të Kosovës.
Deputeti i PDK-së, Abelard Tahiri, ka thënë se nuk do të trajtohet asnjë pikë e seancës pa u trajtuar çështja e veteranëve të luftës së UÇK-së.
Edhe në pjesën e parë të seancës së sotme, deputeti Abelard Tahiri ka hequr nga funksioni mikrofonin e foltores së Kuvendit të Kosovës.
PDK ka kërkuar të anulohet seanca e sotme e Kuvendit dhe sipas PDK-së nuk duhet të mbahen seanca gjersa të zgjidhet çështja e veteranëve.
Në oborrin e Kuvendit, kanë protestuar veteranët e luftës së Ushtrisë Çlirimtare të Kosovës.
Protestuesit po kërkojnë që pensioni për veteranët e UÇK-së të përfshihet në Ligjin për paga.
OVL-UÇK në vazhdimësi kanë kundërshtuar mospërfshirjen e veteranëve në Ligjin për paga.
