Komuniteti rom në Gjakovë, lirohet nga tarifat për leje ndërtimore
Kryetari i komunës së Gjakovës, Ardian Gjini, sot ka nënshkruar një memorandum me IOM-in.
Sipas njoftimit në faqen e komunës, ky memorandum mirëkuptimi është nënshkruar me Organizatën Ndërkombëtare për Migrim (IOM).
“Memorandumi parasheh që komuna e Gjakovës, të liroj nga tarifat për leje ndërtimore personat e zhvendosur nga radhët e komunitetit rom, ashkalinj dhe egjiptian, të cilëve do të ju ndërtohen shtëpi banimi dhe të njëjtat do të financohen nga Bashkimi Evropian dhe mbështeten nga Ministria për Komunitete dhe Kthim”, thuhet në njoftimin e komunës.
Shtatë familjet e të zhvendosurve, do të përfitojnë nga kjo marrëveshje e nënshkruar.
Gjatë ditës së sotme, Ardian Gjini, ka mbajtur një takim për ndjekjen e shkollave nga komunitetet jo-shumicë.
Në këtë takim është diskutuar për procesin e regjistrimit nëpër shkolla të nxënësve jo-shumicë si dhe vijueshmërinë e mësimit të këtyre nxënësve.
Poashtu, anëtarët e komitetit për komunitete, kanë prekur edhe temën për mbeturinat në lagjen komunitare.
Aty është diskutuar për gjendjen e ambientit dhe mbeturinave në lagjet komunitare, e poashtu edhe për kthimin dhe strehimin e qytetarëve nga komunitetet jo-shumicë.
