Komuna e Prishtinës miraton 14 masa të Pakos Ekonomike Emergjente ndaj COVID-19
10.4.2020 - 19:03
Kuvendi komunal i Prishtinës në një mbledhje të jashtëzakonshme të mbajtur sot, ka miratuar Pakon Ekonomike Emergjente që përmban gjithsej 14 masa gjatë kohës kur Kosova po përballet me pandeminë COVID-19.
Me anë të kësaj pakoje komuna e Prishtinës do t’i ndihmojë këto kategori:
- Shpërndarja e 5,000 pakove higjienike në vlerë prej 100 mijë eurove
- Shpërndarja e 5,000 pakove ushqimore në vlerë prej 200 mijë eurove
- Blerja e pajisjeve shëndetësore në vlerë prej 200 mijë eurove
- Dezinfektimi i objekteve dhe hapësirave të ndryshme në vlerë prej 200 mijë eurove
- Lirimi nga qiraja për bizneset me lokale që janë pronë e ndërmarrjeve publike komunale.
- Lirimi nga taksa e shfrytëzimit të hapësirave publike për një vit për të gjitha bizneset e gastronomisë
- Subvencionimi i pagave për muajin prill për NPL Stacioni i Autobusëve për shkak të ndërprerjes së funksionimit në vlerë prej 80 mijë eurove
- Subvencionimi i pagave të punëtorëve të çerdheve publike për muajin prill në vlerë prej 50 mijë eurove
- Lirimi nga pagesa për çerdhet publike për të gjithë prindërit
- Subvencioni i NPL Prishtina Parking që tashmë ka filluar së funksionuari në vlerë prej 50 mijë eurove
- Subvencionimi për sport për klubet në vështirësi për shkak të mosfunksionimit të garave në vlerë prej 100 mijë eurove
- Subvencionimi për kulturë për artistët të cilët nuk kanë të hyra për shkak të virusit në vlerë prej 100 mijë eurove
- Subvencionimi i ndërmarrjeve të prekura nga pandemia si: Hortikultura, Trafiku urban, Sport Marketingu dhe Pastrimi, deri në vlerë prej 250 mijë eurosh.
- Themelimi i programit të granteve për biznese, të vetpunësuarit dhe ndërmarrjet e vogla e të mesme.