KMDLNj: Vendimi i Gjykatës Kushtetuese të respektohet nga të gjitha palët

Këshilli për Mbrojtjen e të Drejtave dhe Lirive të Njeriut KMDLNj ka kërkuar nga të gjitha palët që ta respektojnë aktgjykimin e Gjykatës Kushtetuese.

KMDLNJ, përmes një komunikate tha se Gjykata Kushtetuese e Kosovës mori vendim se Dekreti i Presidentit Thaçi për caktimin e mandatarit për formimin e Qeverisë së Kosovës, pa partinë fituese të zgjedhjeve të 6 tetorit 2019 (VV) është në përputhje me Kushtetutën e Kosovës duke hapur rrugë për formimin e Qeverisë Hoti.

“KMDLNj edhe para se të merret ky vendim ka kërkuar nga të gjitha palët ta respektojnë vendimin dhe të sillen në përputhje me këtë vendim. KMDLNj ishte dhe është kundër çdo fjalori që thërret apo nxitë dhunë sikur edhe kundër linçimit publik që po i bëhet sidomos gjykatësve të Gjykatës Kushtetuese, pasi morën vendimin”, thuhet në njoftim.

KMDLNJ i fton të gjithë liderët e partive politike të ushtrojnë autoritetin për qetësim të situatës duke u distancuar nga çdo kërcënim apo veprim i dhunshëm.

“KMDLNj përkrah çdo protestë apo shprehje të pakënaqësisë që bëhet në përputhje me Ligjin dhe në mënyrë paqësore. Protestat e paralajmëruara nuk kanë asnjë efekt në vendimin e Gjykatës Kushtetuese përveç se do ta dëmtojnë subjektin politik që i organizon protestat në rast se ushtrohet dhunë gjatë protestave. Konstelacioni i krijuar politik pas vendimit të Gjykatës Kushtetuese nuk  siguron një qëndrueshmëri qeverisëse dhe vendi mund të shkojë në zgjedhje të reja në fund të këtij viti apo në fillim të vitit 2021. Në një situatë ku afërsisht 58-60 deputetë shqiptarë janë në opozitë është e paimagjinueshme që mund të merren vendime të mëdha dhe të rëndësishme për Kosovën”, thuhet në njoftim.

KMDLNj pret dhe kërkon që liderët politikë të Kosovës, në mënyrë të përgjegjshme të kontribuojnë që situata të mos përshkallëzojë dhe të bëhet dorëzim-pranimi i përgjegjësive institucionale në mënyrë të qetë ndryshe do të marrin tërë përgjegjësinë për pasojat e mundshme.