Klinaku: Nuk e kemi ndërmend të ndalemi përballë çdo qeverie e çdo kryeministri
Ushtruesi i detyrës së kryetarit të OVL-së së UÇK-së, Faton Klinaku, ka thënë se janë duke protestuar sot pasi sipas tij janë duke u shkelur të drejtat që u takojnë pjesëtarëve të luftës së UÇK-së.
Klinaku ka thënë se OVL-UÇK nuk do të ndalen.
“Kryeneçësia e këtij kryeministri me të cilin u morëm vesh që do të takohemi një herë në muaj, ai mendon që duke mos bashkëpunuar me ne si me sindikatat, e duke mos na mbështetur e përkrahur mendon që do të na shtrijë përtokë. Qeveria shkon e vjen por ne nuk e kemi ndërmend të ndalemi përballë çdo qeverie e çdo kryeministri. Fatkeqësisht duhet të protestojmë për të mbrojtur vlerat e asaj lufte që na solli këtu. Duhet të protestojmë sepse po shkelen të drejtat që u takojnë pjesëtarëve të luftës”, ka thënë Klinaku.
Veteranët e luftës së Ushtrisë Çlirimtare të Kosovës janë duke protestuar para objektit të Kuvendit të Kosovës.
Protestuesit e Organizatës së Veteranëve të Luftës së Ushtrisë Çlirimtare të Kosovës e kanë thyer kordonin e Policisë së Kosovës dhe kanë depërtuar brenda oborrit të Kuvendit të Kosovës.
Faton Klinaku ju ka bërë thirrje protestuesve të ruajnë qetësinë dhe të mos lëndojnë Policinë.
Në oborrin e Kuvendit janë duke qëndruar pjestarë të Policisë dhe Njësisë Speciale.
Protesta e sotme është paralajmëruar nga ana e OVL UÇK, që po kërkojnë tash e sa kohë, që pensioni për veteranët e UÇK-së të përfshihet në Ligjin për paga.
OVL-UÇK në vazhdimësi kanë kundërshtuar mospërfshirjen e veteranëve në Ligjin për paga.
Më 6 qershor, para Kuvendit të Kosovës kanë protestuar Organizata e Veteranëve të Luftës së Ushtrisë Çlirimtare të Kosovës.
Veteranët kanë protestuar për të kundërshtuar mos përfshirjen e tyre në projektligjin për pagat.
