Kineastja kosovare Sevdije Kastrati anëtarësohet në Shoqatën Amerikane të Kinematografisë

Kineastja kosovare, Sevdije Kastrati është anëtarësuar në Shoqatën Amerikane të Kinematografisë (The American Society of Cinematographers – ASC).

Lajmi është bërë i ditur nga ASC-ja përmes një njoftimi.

“ASC mirëpret anëtaren e re Sevdije Kastrati-Dill. Kosovarja ka studiuar në Institutin Amerika të Filmit dhe xhiroi filmat që Kosova paraqiti për Çmimin Oscar për filmin më të mirë ndërkombëtar në 2018 dhe 2019.” – thuhet në njoftimin e ASC-së.

Anëtarësimi i Kastratit në ASC është përshëndetur edhe nga Hajrulla Çeku, ministër për Kulturë, Rini dhe Sport.

“Një lajm që më gëzoi shumë. Sevdije Kastrati, kineastja nga Kosova i bashkohet si anëtare organizatës ‘The American Society of Cinematographers’. Përgëzime Sevdije. Shumë suksese në këtë rrugëtim.” – ka shkruar Çeku në Facebook.

Kienastja Sevdije Kastrati (Dill), sipas uebsajt të saj zyrtar, në vitin 2009 u transferua në Los Anxhelos të SHBA-së, për të studiuar kinematografi në Institutin Amerikan të Filmit, ku u diplomua në vitin 2011.

Filmi i saj i shkurtër “The Return” fitoi Çmimin Më të Mirë Ndërkombëtar në Festivalin “Sundance” në vitin 2012.

Kastrati ishte pjesë e stafeve kinematografike (xhiruese) e shumë filmave, ndër ta edhe “Martesa” dhe “Zana”, të cilët ishin kandidatët e Kosovës për Çmimin “Oscar” në kategorinë për Film të Huaj.

Shoqata Amerikane e Kinematografëve është themeluar në Hollywood në Los Anxhelos në SHBA, në vitin 1919.

Qëllimi i themelimit të ASC-së është avancimi i artit dhe shkencës së kinematografisë – duke mbledhur kienastë dhe shkëmbyer ide për zhvillimin dhe promovimin e artit kinematografik.