KFOR-i sërish ndihmon me pajisje mbrojtëse kundër COVID-19

KFOR-i sot ka bërë shpërndarjen e donacionit të dytë me mjete mbrojtëse kundër COVID-19 në objektet mjekësore dhe institucionet e tjera në Kosovë.

Pas dhurimit të parë që u bë në prill, ushtarët përsëri dorëzuan mijëra maska për fytyrën dhe mburoja, doreza, termometra pa kontakt me rreze infra të kuqe, veshmbathje izolusese dhe antiseptikë për pastrimin e duarve.

“Ekipet Ndërlidhëse dhe Monitoruese të KFOR-it së bashku me ekipet e bashkëpunimit civilo-ushtarak u dhuruan pajisje për mbrojtje personale institucioneve dhe komuniteteve të Pejës, Deçanit, Malishevës, Gjakovës, Prizrenit, Vushtrrisë, Zveçanit, Kamenicë/Dardanë, Skenderajt, Podujevës, Fushë Kosovës, Lipjanit, Novobërdës/Artanës, Gjilanit, Vitisë dhe Ferizajt. Dorëzimet u koordinuan nga shtabi qendror i KFOR-it në koordinim të ngushtë me Komandat Rajonale të saj Lindje dhe Perëndim, përkatësisht të udhëhequra nga SH.B.A. dhe Italia, të cilat u koordinuan me qendrat vendore mjekësore dhe Policinë e Kosovës në fushat e tyre përkatëse të operacioneve, për të vlerësuar prioritetet dhe nevojat. Spitalet, Qendrat e Shëndetit Familjar, Klinikat, Njësitë e Policisë së Kosovës dhe pakicat në tërë Kosovën mund të përfitojnë nga kontributi i paanshëm i KFOR-it në përpjekjet e tyre të përditshme ndaj COVID-19”, thuhet në komunikatë.

KFOR-i thekson se aftësia e tyre për të kontribuar për një mjedis të qetë dhe të sigurt dhe liria e lëvizjes nuk është zvogëluar nga COVID-19, dhe rreth 3.500 ushtarë nga 27 kombe po kryejnë rregullisht operacionet e tyre, ndërsa zbatojnë masa të kujdesshme dhe të ashpra për të kufizuar përhapjen e virusit dhe minimizuar rreziqet për anëtarët e saj dhe për komunitetet të cilave ata shërbejnë, në përputhje me udhëzimet e Organizatës Botërore të Shëndetësisë. /21Media