Foto: Kallxo.com
Këshilli i Përgjithshëm i LDK-së cakton Avdullah Hotin për kryeministër, një votë kundër dhe një abstenim
Lidhja Demokratike e Kosovës ka njoftuar se Këshilli i Përgjithshëm i kësaj partie është përcaktuar që Avdullah Hoti të jetë kandidat për kryeministër.
Kryetari i LDK-së, Isa Mustafa, në një adresim drejtuar anëtarëve të Këshillit, ka bërë të ditur numrin e votave që mori Hoti në këtë propozim përmes votimit elektronik.
Sipas tij, 92 anëtarë kanë votuar për, 1 kundër dhe 1 ka abstenuar.
“Kam kënaqësinë t’ju informoj se nga 94 anëtarë të Këshillit të Përgjithshëm të LDK-së që kanë marrë pjesë në votim, nëntëdhjet e dy (92) kanë votuar për propozimin e Kryesisë së LDK-së, që z. Avdullah Hoti të jetë kandidati ynë për Kryeministër në zgjedhjet e ardhshme parlamentare, një (1) ka votuar kundër dhe një (1) ka abstenuar”, citohet të ketë theksuar Mustafa.
Kryesia e LDK-së dje ka vendosur që Avdullah Hoti të jetë kandidat për kryeministër i kësaj partie në zgjedhjet e ardhshme.
Në fillim të vitit të ardhshëm pritet të mbahen zgjedhjet e jashtëzakonshme parlamentare, pasi Gjykata Kushtetuese e shpalli të pavlefshme zgjedhjen e Qeverisë Hoti.