Kërkohet paraburgim për tre zyrtarët policorë lidhur me rastin ‘Karaçeva’

Prokuroria Themelore në Gjilan ka njoftuar se është kërkuar paraburgim për tre zyrtarë policor të cilët janë ndaluar gjatë ditës së djeshme lidhur me rastin “Karaçeva”.

“Prokuroria Themelore në Gjilan, Departamenti Përgjithshëm, ka kërkuar caktimin e paraburgimit, në kohëzgjatje prej 30 ditësh, nga Gjykata kompetente në Gjilan, ndaj tre (3) zyrtarëve policorë të Drejtorisë Rajonale të Policisë Kufitare – Lindje, tani të pandehurve N.S., N.K. dhe F.K., të cilët janë ndaluar gjatë ditës së djeshme lidhur me rastin ’Karaçeva’”, thuhet në njoftim.

Sipas komunikatës dyshohet se të pandehurit, në cilësinë e zyrtarëve policorë, gjatë muajit dhjetor 2019, në zonën e fshatrave të brezit kufitar mes Republikës së Kosovës dhe Republikës së Serbisë, në mënyrë të vazhdueshme, kanë ndihmuar, fshehur dhe nuk kanë penguar kryerjen e veprave penale, duke iu mundësuar personave të ndryshëm kontrabandimin e mallrave, të cilët kanë kaluar vijën kufitare duke shmangur kontrollin doganor.

“Të njëjtit dyshohet se kanë udhëzuar kontrabanduesit se në cilat vende dhe në çfarë kohe të kalojnë, ku me veprimet apo mosveprimet e tyre i kanë shkaktuar dëm material buxhetit të Republikës së Kosovës në shumë të papërcaktuar”, thuhet në njoftim.

Sipas prokurorisë, me këto veprime, të pandehurit dyshohen se kanë kryer veprën penale ‘’kontrabandimi me mallra’’, e sanksionuar me nenin 311 të Kodit Penal të Republikës së Kosovës, për të cilën me urdhër të prokurorit gjenden në ndalim 48 orësh.