Ilustrim
Kërkohet paraburgim edhe për ish-shoferin e drejtorit të Sekretariatit të KPK-së
Prokuroria e Prishtinës ka kërkuar caktimin e masës së paraburgimit edhe për A.K., ish shoferi i drejtorit të Sekretariatit të Këshillit Prokurorial të Kosovës, Lavdim Krasniqi.
Për KALLXO.com zëdhënësja e Prokurorisë së Prishtinës, Laureta Ulaj, tha se tash më prokurori i rastit ka bërë kërkesë për caktimin e masës së paraburgimit.
KALLXO.com mëson se shoferi i Krasniqit është arrestuar nën dyshimin se ka dhënë ndihmë kryerësve të veprës penale.
Sipas burimeve të KALLXO.com, shoferi dyshohet se me veturë zyrtare e ka kaluar për në Shqipëri të paktën një person të dyshuar për veprën penale të tentim vrasjes.
Shoferi aktualisht është i ndaluar nga Policia e Kosovës dhe pritet në orët në vijim të dihet nëse do të kërkohet ndonjëra nga masat e sigurisë.
KALLXO.com ka provuar që të flasë lidhur me këtë çështje edhe kryesuesin e Këshillit Prokurorial të Kosovës, Jetish Maloku, por i njëjti nuk ka qenë i qasshëm deri në momentin e publikimit të artikullit.
KALLXO.com raportoi se gjatë ditës së djeshme është arrestuar edhe shoferi i Krasniqit i cili është arrestuar nën dyshimin për dhënie të ndihmës kryerësve të veprës penale.
Drejtori i Sekretariatit të KPK-së Lavdim Krasniqi dhe asistentja e tij Marigona Berisha u arrestuan më 1 mars ndërsa ndaj tyre u caktuan edhe masat e sigurisë. Ndaj Krasniqit u caktua masa e paraburgimit ndërsa masa e arrestit shtëpiak u caktua ndaj Marigona Berishës.
Krasniqi po dyshohet për keqpërdorim i detyrës zyrtare, ushtrim i ndikimit, dhënie e ndihmës kryerësve pas kryerjes së veprës penale ndërsa Marigona Berisha për mos lajmërim të veprës penale.
Këshilli Prokurorial ka marrë vendim për suspendimin e Krasniqit dhe Berishës deri në marrjen e një vendimi përfundimtar nga Gjykata.