Kërcënohet me jetë gazetari Vehbi Kajtazi

Asociacioni i Gazetarëve të Kosovës (AGK) ka bërë të ditur se gazetari, Vehbi Kajtazi, ka pretenduar për një numër të madh kërcënimesh, mbi 100, që ka marrë pas deklaratave të tij në RTV Dukagjini rreth ‘Grupit të Kumanovës’.

AGK-ja ka dënuar fuqishëm kërcënimet me jetë ndaj Kajtazit dhe ka ftuar Policinë e Kosovës “që të ofrojë siguri për të dhe personat e afërt të tij, si dhe të trajtojë me prioritet rastin e paraqitur nga ai”.

“Prej asaj dite kam marrë qindra kërcënime me jetë nga persona të ndryshëm. Këto kërcënime janë nxitur edhe nga reagimet e grupit të dënuar të cilët lirshëm shkruajnë e lidhen me Televizione. Sot, zyrtarisht kam hapur rast në Polici kundër një numri prej 100 personash kërcënimet e të cilëve janë shumë serioze. Me rastin tashmë janë duke u marrë Krimet e Rënda në Polici, sektor ky që po merret me verifikimin dhe hetimin e këtyre rasteve. Numri i rastit të hapur në Polici është 2021 – AB 3245”, ka shkruar Kajtazi në letrën për AGK-në.