Këngëtarja me origjinë çame kandidate për deputete nga Vetëvendosje

Këngëtarja shqiptare me origjinë çame, Enkelejda Arifi është bërë pjesë e Lëvizjes Vetëvendosje.

Kryetari i kësaj Lëvizje, Albin Kurti ka njoftuar se Arifi poashtu është në listën e kandidatëve të Vetëvendosjes për deputetë në Kuvendin e Kosovës.

“Ajo vjen nga Durrësi ku është shkolluar për muzikë (flautë dhe kanto) dhe jeton në Gjilan ku punon si zyrtare për kulturë në komunë që nga viti 2010. Ajo është këngëtare profesioniste prej 25 vitesh dhe ka një krijimtari të gjerë ku përfshihen dhjetra albume e këngë të zhanreve të ndryshme”, ka treguar Kurti për përvojën e Arifit.

Enkelejda në vitet 2001 e 2002 ishte mësimdhënëse në shkollën fillore “Abdullah Tahiri” të Malishevës në Gjilan, pastaj deri në 2006 ka punuar në programin për shoqërinë civile të NDI, për të vazhduar në vitin 2007 si koordinatore e NDI për Gjilan.

Në vitet 2008 dhe 2009 ka qenë pjesë e KQZ-së në Gjilan si dhe trajnere për procesin zgjedhor. Ka përvojë disa vjeçare dhe është eksperte në avokim, lobim, monitorim të pushtetit lokal dhe procesit zgjedhor.