KEDS akuzon banorë të Korroticës së Epërme për vjedhje të rrymës, kryetari i fshatit i mohon akuzat

Kompania për Distribuimin e Energjisë Elektrike në Kosovë (KEDS) ka akuzuar banorë të fshatit Korroticë e Epërme të Drenasit për vjedhje të energjisë elektrike.

Por, Xhafer Doberdolani, kryetar i fshatit Korroticë e Epërme, i ka mohuar akuzat e KEDS-it.

Përmes një postimi në Facebook, KEDS ka thënë se dhjetëra banorë të Korroticës së Epërme e kanë vjedhur gjatë dhjetorit 2024 më tepër se gjysmën e rrymës.

“Saktësisht, në një trafo që gjendet në këtë fshat, u vodh 59% e energjisë elektrike gjatë dhjetorit të fundit nga 57 shtëpi të alokuara aty. Kur vjedhja e energjisë elektrike bëhet normë, mbingarkesa në transformator, rënia e tensionit dhe rrezikshmëria e lartë bëhen praktikë”- thuhet në njoftimin e KRDS në Facebook.

Në anën tjetër, Xhafer Doberdolani, kryetar i fshatit Korroticë e Epërme, i ka mohuar akuzat e KEDS-it për vjedhje të rrymës nga fshatarët.

“Kjo është rrenë e kulluar se në Korroticë të Epërme KEDS krejt i ka ngjitë shtyllat e betonit e me kabllo dhe orët i kanë ngjitë në majë të shtyllës dhe nuk ka askush që mundet me vjedh. Unë po të garantoj se ajo lagje nuk vjedh rrymë”- ka thënë ai për KALLXO.com.

KEDS i paralajmëron të gjithë konsumatorët që të mos e keqpërdorin energjinë elektrike në të kundërtën do të përballen me masa ligjore.